13.12.2024 | 23:31
Գերմանիան հավանություն է տվել 2006թ․ ի վեր զենքի ամենամեծ արտահանմանը Թուրքիա
Զախարովան Ռուսաստանի և ՀԱՊԿ-ի մասին ՀՀ հայտարարությունները «սուտ» է որակել
Քաղաքականություն
03.04.2024 | 13:04
Հայտարարությունները, թե Ռուսաստանն ու ՀԱՊԿ-ը օգնություն չեն ցուցաբերել Հայաստանին Ղարաբաղում հակամարտության սրման պայմաններում, սուտ են։ Այս մասին «Զվեզդա» հեռուստաալիքին տված հարցազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան՝ նշելով, թե «Երևանը որոշել է պաշտոնապես հրաժարվել Ղարաբաղից արևմտյան երկրների հետ խորհրդակցություններից հետո»։
«Պաշտոնական Երևանն ասել է, որ ամեն ինչը Ռուսաստանի ու ՀԱՊԿ-ի պատճառով է։ Ես ստի մեջ եմ մեղադրում բոլոր նրանց, ովքեր այդ գաղափարն են դավանում ու տարածում։ Սա ճիշտ չէ, սուտ է։ Այդ որոշումը պաշտոնական Երևանը կայացրել է Արևմուտքի հետ խորհրդակցություններից հետո»,- ասել է Զախարովան։
Նա նշել է, թե ՌԴ նախագահ Վլադիմիր Պուտինը, իբր, օգտագործել է բոլոր հնարավորությունները, ներառյալ՝ քաղաքական և անձնական, արյունահեղությունից խուսափելու համար։ Զախարովայի խոսքով՝ Մոսկվան փորձել է կասեցնել տարածաշրջանում լայնամասշտաբ պատերազմի բռնկումը և փրկել Հայաստանի քաղաքացիներին։ Նա այդպես է չի նշել, թե ինչպես է ստացվել, որ Արցախում տեղակայված ռուս խաղաղապահները ոչինչ չեն ձեռնարկել՝ կանխելու հայ բնակչության էթնիկ զտումը։
Փոխարենը, ՌԴ ԱԳՆ ներկայացուցիչն ասել է, թե «Երևանի ու Բաքվի հարաբերությունների հնարավոր վատթարացումը կախված է նրանից, թե Հայաստանի իշխանությունները որքանով թույլ կտան ԱՄՆ-ին և Եվրամիությանը ապակառուցողական կերպով ազդել իրավիճակի վրա»։
