Բաքուն «անհիմն» է որակում Ֆրանսիայի ԱԳ նախարարի հայտարարությունները

Պաշտոնական Բաքուն արձագանքել է Ֆրանսիայի ԱԳ նախարար Ստեֆան Սեժուրնեի՝ ՀՀ-ի տարածքային ամբողջականությանը Ադրբեջանի կողմից սպառնալիքների վերաբերյալ հայտարարություններին, որոնք նա արել էր ԱՄՆ պետքարտուղար Էնթոնի Բլինքենի հետ համատեղ մամուլի ասուլիսում։

«Ֆրանսիայի Եվրոպայի և արտաքին գործերի նախարար Ստեֆան Սեժուրնեի կողմից 2024 թվականի ապրիլի 2-ին Փարիզում ԱՄՆ պետքարտուղարի հետ համատեղ մամուլի ասուլիսի ժամանակ Ադրբեջանի հասցեին արված անհիմն մեղադրանքները դարձյալ տարածաշրջանում ակնհայտ լարվածություն ստեղծելու և խաղաղության գործընթացին խոչընդոտելու Ֆրանսիայի ջանքերի վառ օրինակն են»,- ասել է Ադրբեջանի ԱԳՆ խոսնակ Այխան Հաջիզադեն։

Նա նշել է, թե «անընդունելի է, որ ֆրանսիական կողմը, որն ակտիվորեն զինում է Հայաստանին և խրախուսում տարածաշրջանում միլիտարիզմը, Ադրբեջանին մեղադրում է ագրեսիվ հռետորաբանության մեջ»։

«Բոլորին պետք է պարզ լինի, որ Ֆրանսիայի նման երկրների քաղաքականությունը, որը վերջին 30 տարիներին կոծկում է Հայաստանի ագրեսիան, ոչ մի օգուտ չի բերել։ Միաժամանակ, ֆրանսիական կողմը պետք է հասկանա, որ քանի դեռ նրա ապակառուցողական գործունեությունը չի դադարեցվել, դա օգուտ չի բերի ինչպես Ֆրանսիայի, այնպես էլ Հայաստանի խաթարված իմիջին, որին նա ամեն կերպ պաշտպանում է»,-հայտարարել  է Ադրբեջանի ԱԳՆ խոսնակը։

Հիշեցնենք՝ ԱՄՆ պետքարտուղար Էնթոնի Բլինքենի հետ համատեղ մամուլի ասուլիսում Ֆրանսիայի ԱԳ նախարար Ստեֆան Սեժուրնեն ասել էր․ «Մենք վերահաստատել ենք մեր հավատարմությունը Հայաստանի տարածքային ամբողջականությանը, որն այժմ կասկածի տակ է դրվում Ադրբեջանի կողմից, և թույլ տվեք ասել, թե որքան անհանգստացած ենք դրա համար, հաշվի առնելով, որ Ադրբեջանի հռետորաբանությունը գնալով անվերահսկելի է դառնում»։