06.04.2026 | 23:30
Հրդեհ Թաիրով բնակավայրում. այրվել է ավտոմեքենա
Ադրբեջանում բանտարկված լրագրողներից մեկը փորձել է ինքնասպան լինել
Քաղաքականություն
01.04.2024 | 16:50
Ադրբեջանական «Kanal 13» համացանցային լրատվամիջոցի լրագրող Շամո Էմինովը, որը կալանավորված է , ինքնասպանության փորձ է կատարել։ Այդ մասին, ըստ նրա փաստաբան Էլչին Սադիգովի, մարտի 29-ին դատարանում իրեն ասել է ինքը՝ Շամո Էմինովը։ Վերջինս գտնվում է Բաքվի քննչական մեկուսարանում։
Նա ասել է, որ քննչական մեկուսարանում իրեն բազմիցս սպառնացել ու վիրավորել են։ Հերթական նման դեպքից հետո Էմինովը ապակու կտորով կտրել է ձեռքերը։
«Նրա խոսքով՝ ինքը չի դիմանում վիրավորանքներին և փորձել է ինքնասպան լինել»,- ասել է փաստաբան Էլչին Սադիգովը տեղական լրատվամիջոցներին։ Շամո Էմինովը խոսել է նաև իր առողջական խնդիրների մասին։
Լրագրողի կինը՝ Դուրդան Էմինովան նույնպես հայտնել է, որ ամուսինը լուրջ խնդիրներ ունի ստամոքսի ու լյարդի հետ։
Դուրդանա Էմինովան դիմել է համապատասխան կառույցներին՝ ամուսնուն Քրեակատարողական ծառայության հիվանդանոց տեղափոխելու խնդրանքով։
Հավելենք, որ Շամո Իմանովը ձերբակալվել էր 2023թ-ի դեկտեմբերի 22-ին։ Դատարանը նրան երեք ամսով կալանավորել էր մաքսանենգության մեղադրանքով։ Իմանովն իրեն մեղավոր չի ճանաչում։
Շամո Էմինովի խափանման միջոցը մարտի 19-ին երկարացվել է ևս 2 ամսով։
Նրա փաստաբանը բողոք էր ներկայացրել Սաբայիլի շրջանային դատարանի այս որոշման դեմ։Մարտի 29-ին Բաքվի վերաքննիչ դատարանը դատավոր քննարկել է բողոքը և որոշումը թողել անփոփոխ։
Վերջին ամիսների ընթացքում Ադրբեջանում մաքսանենգության մեղադրանքով ձերբակալվել են տարբեր լրատվամիջոցներ ներկայացնող շուրջ երկու տասնյակ լրագրողներ։
Խուզարկություններ են իրականացվել Abzas Media-ի, Toplum TV-ի գրասենյակներում և որոշ լրագրողների բնակարաններում։ Միջազգային կառույցները կոչ են անում Ադրբեջանի իշխանություններին դադարեցնել բռնաճնշումներն ու լրագրողներին ազատ արձակել։
Էմմա Չոբանյան
