ԱԺԲ-ի գրասենյակներում, ղեկավար կազմի տներում հայտնաբերվել են նաև ռազմական նշանակության իրեր. ՔԿ

«Ազգային ժողովրդավարական բևեռ»-ի՝ ԱԺԲ-ի ղեկավարների տներում և գրասենյակներում խուզարկություններով հայտնաբերվել են քննությանը հետաքրքրող բազմաթիվ իրեր, այդ թվում՝ նաև ռազմական նշանակության,այս մասին Factor.am-ին տեղեկացրեց Քննչական կոմիտեի խոսնակ Գոռ Աբրահամյանը։

Նա նշեց, որ հայտնաբերված իրերի օրինականությունն ստուգելու, ինչպես նաև հետագա այլ քննչական գործողություններ կատարելուն ուղղված գործընթացներ են կատարվում։

Հիշեցնենք, որ մարտի 29-ին ոստիկանության Նոր Նորքի բաժնի տարածքում ահաբեկչության գործով խուզարկություններ են իրականացրել ԱԺԲ ղեկավար կազմի, այդ թվում՝ Ժիրայր Սեֆիլյանի, Կարո Եղնուկյանի, ինչպես նաև՝ նրանց աջակիցների բնակարաններում։

Հիշեցնենք նաև, որ մարտի 24-ին նռնակով զինված երեք տղամարդ, փորձել էր ներխուժել Ոստիկանության Նոր Նորքի բաժին։ Նրանք ոստիկանության շենքի մոտ նռնակ էին պայթեցրել, ինչի հետևանքով հենց նրանցից երկուսը բեկորային վիրավորվում էին ստացել և տեղափոխվել հիվանդանոց։ Երրորդ տղամարդուն վնասազերծել էր ԱԱԾ հատուկ նշանակության ջոկատը։

Դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 308-րդ հոդվածի 1-ին մասի (ահաբեկչություն) հատկանիշներով։ Նրանց մեղադրանք է ներկայացվել ՀՀ քրեական օրենսգրքի 308-րդ հոդվածի 1-ին մասով (ահաբեկչությունը) և 335-րդ հոդվածի 2-րդ մասով (խմբի կազմում հրազենի, դրա հիմնական բաղկացուցիչ մասերի, ռազմամթերքի և այլ նյութերի, սարքերի, առարկաների ապօրինի շրջանառությունը) նախատեսված հանցավոր արարքներ կատարելու համար։ Ըստ ՆԳՆ-ի՝ նրանք եղել են «ԱԺԲ»-ի աջակիցներ։