Սա շրջադարձային կետ է․ Էրդողանն ընդունել է ՏԻՄ ընտրություններում պարտությունը

Թուրքիայի նախագահ Ռեջեփ Թայիփ Էրդողանը «Արդարություն և զարգացում» կուսակցության կենտրոնակայանից ուղերձով դիմել է քաղաքացիներին՝ կապված տեղական ինքնակառավարման մարմինների ընտրություններում իր գլխավորած ուժի պարտության հետ։

«Ժողովրդի կամքը դրսևորվում է քվեատուփի մոտ, ժողովուրդը քվեաթերթիկի միջոցով արտահայտում է իր կարծիքը՝ իր ուղերձը հասցնելով քաղաքական գործիչներին»,- հայտարարել է նա։ Էրդողանը ընտրության արդյունքնեն իր կուսակցության համար «շրջադարձային կետ» է որակել, սակայն խոստացել է «հարգել ազգի որոշումը»։

«Մայիսի 14-28-ի ընտրություններում մեր հաղթանակից 9 ամիս անց, ցավոք, մենք չհասանք այն արդյունքներին, որոնց հույս ունեինք ՏԻՄ ընտրություններում»,- ասել է Էրդողանը՝ հավելելով․

«Մեր կուսակցության մարմիններում ՏԻՄ ընտրությունների արդյունքները կգնահատենք հրապարակայնորեն և համարձակորեն ինքնաքննադատությամբ ենք զբաղվելու։ Մենք միշտ կանգնած ենք եղել ժողովրդավարության կողքին, այսօր էլ շարունակում ենք գործել նույն պատասխանատվությամբ՝ իշխանությունը ժողովրդի կամքից վեր չդնելով։ «Մենք առավելագույն ճշգրտությամբ և օբյեկտիվությամբ կգնահատենք քվեատուփի մոտ ժողովրդի կողմից տրված ուղերձները և համապատասխան քայլեր կձեռնարկենք»։

Հիշեցնենք, որ Թուրքիայում մարտի 31-ին կայացած  ՏԻՄ ընտրություններում երկրի գլխավոր ընդդիմադիր Ժողովրդահանրապետական կուսակցությունը հաղթում է ընդհանուր պատկերում՝ առաջ անցնելով Էրդողանի «Արդարություն ու զարգացում» կուսակցությունից։ Ըստ ոչ պաշտոնական տվյալների՝ քվեաթերթիկների 99․82 տոկոսի մշակմամբ՝ CHP-ն հավաքել է ձայների ավելի քան 37,74 տոկոսը, ԱԶԿ-ն՝ 35,49 տոկոսը։