14.07.2026 | 23:29
Հանրապետության որոշ հասցեներում էլեկտրամատակարարումը կդադարեցվի
Ուշադրություն է դարձվելու ՀՀ-ի տնտեսական կայունությանը․ Պետեր Ստանոն՝ ՀՀ-ԱՄՆ-ԵՄ հանդիպման մասին
Քաղաքականություն
29.03.2024 | 13:05
Եվրամիության արտաքին քաղաքականության ծառայության խոսնակ Պետեր Ստանոն անդրադարձել է ապրիլի 5-ին Բրյուսելում կայանալիք ՀՀ-ԱՄՆ-ԵՄ եռակողմ հանդիպմանը, գրում են ադրբեջանական լրատվամիջոցները։
«Ճիշտ չէ, որ հանդիպման ընթացքում քննարկվելու են «անվտանգության երաշխիքները»։ Չեն քննարկվելու այն հարցերը, որոնք դուրս են ԵՄ-ԱՄՆ-Հայաստան երկկողմ օրակարգից»,- ասել է նա։
Ստանոն ընդգծել է՝ հանդիպման թեմա չեն հանդիսանում ո՛չ կարգավորման ներկայիս գործընթացը, ո՛չ խաղաղ բանակցությունները, ո՛չ Հայաստանի և Ադրբեջանի հարաբերությունները։
«Հիմնական ուշադրությունը դարձվելու է Հայաստանի տնտեսական կայունությանը և այդ երկրի հետ մեր երկկողմ համագործակցությանը։ Բարձր մակարդակի հանդիպումը, որը Եվրամիությունը կազմակերպում է ԱՄՆ-ի և Հայաստանի հետ, երկկողմ ուշադրություն է դարձվելու Հայաստանի հետ մեր համագործակցության վրա։ Այս մասին հայտարարվել է անցյալ տարվա հոկտեմբերին Եվրոպական քաղաքական համայնքի գագաթնաժողովի շրջանակում։ ԵՄ-ն և ԱՄՆ-ը կիսում են Հայաստանի և տարածաշրջանի կայուն, խաղաղ, անվտանգ և բարգավաճ ապագային աջակցելու հանձնառությանը»,- ասել է Ստանոն։
Նրա խոսքով՝ հանդիպումն այս հանձնառության ցուցադրումն է և արտացոլում է շարունակական անդրատլանտյան համագործակցությունը փոխադարձ հետաքրքրություն ներկայացնող բոլոր հարցերի շուրջ։
«Սա հնարավորություն կտա քննարկելու Հայաստանի հետ մեր խորացող համագործակցությունը՝ բարձրացնելու նրա տնտեսական կայունությունը՝ հիմնված ԵՄ-ի և Հայաստանի միջև երկկողմ Համապարփակ և ընդլայնված գործընկերության ու ԵՄ-Հայաստան Գործընկերության նոր ծրագրի վրա վերջերս մեկնարկած աշխատանքի համատեքստում: Կայուն ու ավելի դիմակայուն Հայաստանը նշանակում է ավելի կայուն Հարավային Կովկաս։ Մեր ջանքերն ուղղված չեն որևէ մեկի դեմ, այլ համապատասխանում են ամբողջ տարածաշրջանի ու նրա կայունության շահերին»,- հայտարարել է Ստանոն։
Նշենք, որ հանդիպումը տեղի է ունենալու ապրիլի 5-ին Բրյուսելում՝ ՀՀ վարչապետ Նիկոլ Փաշինյանի, ԱՄՆ պետքարտուղար Էնթոնի Բլինքենի ու Եվրահանձնաժողովի նախագահ Ուրսուլա ֆոն դեր Լեյենի մասնակցությամբ։
Ավելի վաղ հանդիպման վերաբերյալ իրենց դժգոհություններն էին հայտնել Ադրբեջանի ԱԳՆ-ն ու ՌԴ ԱԳՆ պաշտոնական ներկայացուցիչ Մարիա Զախարովան։
Էմմա Չոբանյան
