Քաղաքականություն
28.03.2024 | 13:07
Ուկրաինայի պաշտպանության նախարարության գլխավոր հետախուզական վարչության ղեկավար Կիրիլ Բուդանովը հայտարարել է, որ ռուսական հատուկ ծառայությունները նախօրոք իմացել են «Կրոկուս Սիթի Հոլ»-ում նախապատրաստվող ահաբեկչության մասին։
«Առնվազն 2024 թ-ի փետրվարի 15-ից Ռուսաստանը իմացել է նախապատրաստման մասին։ Կասեմ ավելին՝ այդ տեղեկատվությունը փոխանցվել է Սիրիայում հետախուզական խմբերի միջոցով։ Այդտեղից էլ հասել է Մոսկվա։ Թող մեզ հեքիաթներ չպատմեն, թե դա ինչ-որ տարօրինակ կերպով նյութականացվել է ոչ մի տեղից»,-ասել է Բուդանովը Ռազմավարական հաղորդակցությունների երրորդ միջազգային ֆորումում:
Նրա խոսքով՝ Կրեմլում իմացել են, որ երկու երկրներից են զինյալները ժամանելու Ռուսաստան։
«Ինչի համար են թույլ տվել, որ տեղի՞ ունենա՝ մի քանի տարբերակներ կան։ Առաջինն, ինչպես ընդունված է իրենց մոտ, «աշտարակների» պայքարն է, որպեսզի հեռացնեն մի քանի պաշտոնյայի։ Մյուս տարբերակը՝ նրանք իսկապես թերագնահատել են տեղի ունենալիքի մասշտաբները։ Մտածել են, որ դա կլինի տեղային մի բան և ցանկացել են Ուկրաինային մեղադրել ամենում»,- նշել է Բուդանովը։
Խոսելով «ուկրաինական հետքի» մասին, որը Կրեմլը փնտրում է ահաբեկչության մեջ՝ նա ասել է, որ Ռուսաստանի իշխանություններն արդեն երեք անգամ փոխել են տեղի ունեցածի վարկածները։
«Հայտնվել են Պատրուշևի ու Բորտնիկովի բացատրությունները, որոնք անձամբ ինձ են մեղադրել, և որ ամենն արել է Ուկրաինան։ Դա հիմարություն է։ Եթե մենք անդրադառնում ենք այս ցավոտ թեմային, պետք է ասեմ՝ չնայած, որ նա մեր թշնամին է, ես սկզբունքորեն հավանություն չեմ տալիս խաղաղ բնակչության դեմ ահաբեկչական գործողություններին»,- հայտարարել է Ուկրաինայի ռազմական հետախուզության ղեկավարը։
