Քաղաքականություն
26.03.2024 | 22:08
«Կրոկուս սիթի հոլլի» անվտանգության աշխատակիցները հրազենի մի ամբողջ զինանոց և արագ արձագանքման խումբ են ունեցել, սակայն որևէ կերպ չեն դիմադրել ահաբեկիչներին, գրում է «Կարևոր պատմություններ» տելեգրամ-ալիքը։
«Կրոկուս պրոֆի» մասնավոր անվտանգության ընկերությունը, որն ապահովում էր «Կրոկուս սիթի հոլլի» անվտանգությունը, ուներ մի քանի տասնյակ ծառայողական ԻԺ-71 ատրճանակներ («Մակարով» ատրճանակի ձևափոխված տեսակը) և «Սայգա-20ԿՎ» որսորդական հրացաններ, ասել է Պետդումայի պատգամավոր, Ռոսգվարդիայի ղեկավարի նախկին խորհրդական Ալեքսանդր Խինշտեյնը։
Զինանոցը գտնվում էր Կրասնոգորսկում, Մեժդունարոդնայա 6 հասցեում՝ ահաբեկչության վայրի անմիջապես մոտակայքում, ասել է նա: Այնտեղ եղել է նաև արագ արձագանքման խումբ, որը չի մեկնել կրակոցների վայր։
«Կարևոր պատմություններ»-ը հայտնել է, որ «Կրոկուս պրոֆի» անվտանգության ապահովման մասնավոր ընկերությունը պատկանում է 57-ամյա Քամիլ Ալիևին (90%) և 68-ամյա Վիկտոր Կոտովին (10%)։ Մինչև 2010 թվականը «Կրոկուսի» սեփականատեր Արազ Աղալարովն ունեցել է 3,2% բաժնետոմս։ Անվտանգության մասնավոր ընկերությունում կա 166 մարդ։
Քամիլ Ալիևն ավելի քան 10 տարի աշխատել է «Կրոկուսի» անվտանգության կառույցներում։ Վիկտոր Կոտովն ավելի քան 20 տարի աշխատում է «Կրոկուս պրոֆի» անվտանգության մասնավոր ընկերության ղեկավարությունում։ Այս մասնավոր ընկերության անվտանգության աշխատակիցը Baza-ին ասել է, որ անվտանգության աշխատակիցները թաքնվել են ահաբեկիչներից, երբ սկսվել են կրակոցները։
Հավելենք, որ ՌԴ Քննչական կոմիտեն ստուգումներ է իրականացնում «Կրոկուսի» հրդեհային անվտանգության համակարգում։ Ականատեսները հայտնել են, որ կենտրոնի որոշ դռներ և աստիճաններ արգելափակված են եղել։
