Քաղաքականություն
26.03.2024 | 17:49
Թուրքիայի ներքին գործերի նախարար Ալի Երլիքայան հայտարարել է, որ Թուրքիայի 30 նահանգներում ԻԼԻՊ-ի դեմ իրականացված գործողությունների ընթացքում ձերբակալվել է 147 կասկածյալ, գրում են թուրքական լրատվամիջոցները։
«ԻԼԻՊ ահաբեկչական կազմակերպության դեմ իրականացված գործողության ընթացքում 30 նահանգներում ձերբակալվել է 147 կասկածյալ»,- գրել է նա X-ի իր էջում։
Նախարարը նաև հայտնել է, որ 2023 թվականի հունիսի 1-ից մինչև 2024-ի մարտի 25-ը ԻԼԻՊ-ի դեմ իրականացվել է 1,329 գործողություն։ Դրանց ընթացքում բերման է ենթարկվել 2919 կասկածյալ, որոնցից 692-ը ձերբակալվել է, 531-ի նկատմամբ կայացվել են դատական հսկողության որոշումներ, 187 անձի գործով դատավարությունը շարունակվում է։
Նշենք, որ ՌԴ-ում «Կրոկուս սիթի հոլլ» համերգասրահում տեղի ունեցած ահաբեկչությունից հետո, որի պատասխանատվությունը, ըստ արևմտյան աղբյուրների տեղեկությունների, ստանձնել է ԻԼԻՊ-ը, Թուրքիայում ակտիվ գործողություններ են տեղի ունենում։ Դրանք ընթանում են նաև լուրերի ֆոնին, որ ահաբեկչության կազմակերպիչներից երկուսը եղել են Թուրքիայում։
Կիրակի Երլիքայան հայտնել էր, որ ոստիկանությունը երկրի 8 նահանգներում իրականացրած գործողությունների արդյունքում ձերբակալել է 40 կասկածյալի, որոնք, ենթադրաբար, առնչություն ունեն ԻԼԻՊ-ի հետ։
