Քաղաքականություն
26.03.2024 | 12:25
Հայաստանն ակնկալում է, որ Թուրքիայի հռետորաբանությունն ուղղված չի լինի տարածաշրջանային լարվածության ավելացմանը, այլ կնպաստի երկխոսության և համագործակցության խթանմանը։ Այս մասին հայտարարել է ՀՀ վարչապետ Նիկոլ Փաշինյանը հունական Kathimerini-ի հետ զրույցում։
Ըստ հրապարակման՝ վերջերս Հունաստանի և Թուրքիայի միջև «Բարեկամական հարաբերությունների և բարիդրացիության մասին հռչակագրի» ստորագրումը նվազեցրել է լարվածությունը երկու երկրների միջև։ Հարցին՝ որպես Թուրքիայի արևելյան հարևան՝ արդյո՞ք նկատելի է տարածաշրջանային լարվածության և բորբոքված հայտարարությունների նվազում, Փաշինյանը պատասխանել է, որ Թուրքիան տարածաշրջանային խաղացող է և բնական է ակնկալել, որ Անկարան պետք է հավասարակշռված դիրքորոշում ունենա տարածաշրջանում տեղի ունեցող տարբեր զարգացումների վերաբերյալ։
«Ոչ պակաս ուշադրություն է դարձվում Թուրքիայի պաշտոնական հռետորաբանությանը, որը կարող է և՛ խթանել, և՛ վտանգել գործընթացները։ Մյուս կողմից՝ Հայաստանն ակնկալում է, որ Թուրքիայի հռետորաբանությունն ուղղված չի լինի տարածաշրջանային լարվածության ավելացմանը, այլ կնպաստի տարածաշրջանում երկխոսության և համագործակցության խթանմանը»,- ասել է նա։
Փաշինյանը նշել է, որ Հայաստանն ու Թուրքիան սկսել են հարաբերությունների կարգավորման գործընթաց, որն ուղղված է երկրների միջև դիվանագիտական հարաբերությունների հաստատմանն ու սահմանների լիարժեք բացմանը։
«Այս գործընթացի շրջանակում պայմանավորվածություն է ձեռք բերվել երրորդ երկրների քաղաքացիների և դիվանագիտական անձնագրեր ունեցող անձանց համար հայ-թուրքական ցամաքային սահմանների բացման վերաբերյալ։ Այնպես որ, մենք իսկապես հավատում ենք, որ այս համաձայնագրի իրականացումը դրական ազդեցություն կունենա նաև տարածաշրջանային դինամիկայի վրա»,- նշել է Նիկոլ Փաշինյանը՝ հավելելով, որ Հունաստանի և Թուրքիայի միջև տեղի ունեցող զարգացումները ևս մեկ անգամ ապացուցում են, որ հնարավոր է հաղթահարել տարաձայնությունները և ձևավորել հարևանների միջև համագործակցության փոխշահավետ օրակարգ։
