Հայաստանն այսօր ծանր ժամանակներ է ապրում, բայց վստահ եմ` թունելից դուրս ենք գալու. Հրանտ Վարդանյան. ՏԵՍԱՆՅՈՒԹ

«Կցանկանայի վաղվա օրվա մասին ֆիլմ նկարել։ Այսօր ես փորձում եմ մտքով ազատ լինելով՝ իրատեսորեն նայել կյանքին, իսկ իրականությունը երբեմն դաժան է, երբեմն՝ զավեշտալի։ Ինձ համար շատ հետաքրքիր է այն ժամանակը, որում մենք ապրում ենք։ Հայաստանն այսօր շատ ծանր ժամանակ է ապրում, բայց վստահ եմ, որ շատ չանցած՝ դուրս ենք գալու այս վիճակից։ Թունելի վերջում լույս եմ տեսնում, պարզապես պետք է դուրս գանք այդ թունելից, որպեսզի լույսի մեջ հայտնվենք»,- Factor TV-ի հետ զրույցում նշում է կինոռեժիսոր Հրանտ Վարդանյանը։

Հրանտ Վարդանյանն ասում է՝ պետք չէ միմյանց վախեցնել արտաքին թշնամիներով․ «Մեզ ո՛չ թուրքով վախեցրեք, ո՛չ ռուսով․ վախը բերում է բանականության կորստի, որքան շատ ենք միմյանց վախեցնում, այնքան պարալիզացվում ենք, հիմար բաներ ենք անում։ Այսօր ես տեսնում եմ ռուսական կայսրությունից պոկվելու, գաղութից ազատվելու մղում։ Տասնյակ տարիներ ամեն բան կախված է եղել Մոսկվայից։ Եթե ներկայիս իշխանությունը կարողանա երկիրն ազատել գաղութից, դա կլինի ամենամեծ գործը վերջին 35 տարում»։

Ռեժիսորը խոսում է նաև հայ կինոյի ներկայիս վիճակի մասին` նշելով, որ այն ունի միջազգայնացման հեռանկարներ, սակայն տեխնիկապես դեռ թույլ է. «Մենք չունենք կինոինդուստրիա, տարեկան չնչին թվով ֆիլմեր ենք նկարում`նվիրյալների հաշվին: Մինչդեռ պետք է տարեկան գոնե 20 մեծ ֆիլմ նկարեինք: Մեր կինոստուդիաները տեխնիկապես հետ են, հայ կինոն գոյատևում է անհատների շնորհիվ»:

Մանրամասները՝տեսանյութում։

Աննա Բաբաջանյան