15.01.2026 | 09:31
ՀՀ տարածքում կան փակ ավտոճանապարհներ
«Սուրմալու» և «Տաշիր» առևտրի կենտրոնների գործունեությունը կրկին կասեցվել է
19.03.2024 | 14:24
«Սուրմալու» առևտրի կենտրոնի գործունեությունը կրկին կասեցվել է։ Այս մասին Factor.am-ին հայտնեց ՔՏՀԱ մամուլի խոսնակ Ելենա Զոհրաբյանը։
Տեսչական մարմինը առևտրի կենտրոնում շուրջ մեկ ամիս առաջ վերստուգումներ է իրականացրել և արձանագրել մի շարք խախտումներ, որոնք առկա են եղել նաև նախորդ ստուգումների ժամանակ։
Խոսնակը տեղեկացրեց, որ առևտրի կենտրոնը դիմում է ներկայացրել խախտումները վերացնելու մասին։ Տեսչական մարմնի աշխատակիցները կրկին պիտի ստուգումներ անեն առևտրի կենտրոնում և համոզվեն՝ հայտնաբերված խախտումներն իսկապես վերացրել են, թե ոչ։
Բացի «Սուրմալու»-ից, մասնակի կասեցվել է նաև «Տաշիր» առևտրի կենտրոնի գործունեությունը՝ կրկին հրդեհային անվտանգության կանոնները չպահպանելու համար։
Հիշեցնենք, որ այս առևտրի կենտրոններում տեսչական մարմինը ստուգումներ իրականացրել էր նաև անցյալ տարի։ Խոսնակն ասաց, որ վերստուգումներ արել են կարգադրագրերի ժամկետը լրանալու հիմքով։
Հիշեցնենք, որ «Սուրմալու» առևտրի կենտրոնում 2022 թվականի օգոստոսին տեղի ունեցած պայթյունը 16 մարդու կյանք խլեց․ միայն դրանից հետո պարզ դարձավ, որ տեսչական մարմինն առևտրի կենտրոնում տեխնիկական և հրդեհային անվտանգության նորմատիվ փաստաթղթերի պահանջների շուրջ 5 տասնյակ խախատումներ էր հայտնաբերվել։ Իսկ օգոստոսի 14-ի ողբերգական պայթյունից հետո ստուգումների արդյունքում 66 խախտում էր հայտնաբերվել։
Արփի Հակոբյան
