19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
ՆԱՏՕ-ն աջակցում է Հայաստանի ու Ադրբեջանի միջև երկարաժամկետ խաղաղությանը․Ստոլտենբերգ
Քաղաքականություն
19.03.2024 | 11:15
ՆԱՏՕ-ն Ադրբեջանի և Հայաստանի միջև բանակցություններում միջնորդ չէ, այլ հանդես է գալիս այս երկրների միջև երկարաժամկետ խաղաղության օգտին։ Այս մասին հայտարարել է Հյուսիսատլանտյան դաշինքի գլխավոր քարտուղար Յենս Ստոլտենբերգը ադրբեջանական պետական AzTV-ի հետ հարցազրույցում։
«Հայաստանի ու Ադրբեջանի միջև երկարաժամկետ խաղաղությունը շատ կարևոր է։ Նախօրեին մեր հանդիպման ժամանակ նախագահ Իլհամ Ալիևը նշել է, որ Ադրբեջանն ու Հայաստանn ավելի քան երբևէ մոտ են խաղաղությանը, և ես լիովին աջակցում եմ դրան», – ասել է Ստոլտենբերգը։
Նա նշել է, որ խաղաղության հաստատումը նպաստելու է տարածաշրջանում տնտեսական զարգացմանը։
«ՆԱՏՕ-ն միջնորդ չէ անցկացվող բանակցություններում, սակայն աջակցում է երկարաժամկետ խաղաղությանը, քանի որ դա շատ կարևոր է և՛ տարածաշրջանային, և՛ գլոբալ անվտանգության ու կայունության համար։ Իսկ խաղաղությունը անհրաժեշտություն է ապագա բարգավաճման համար, քանի որ խաղաղ պայմանները նպաստում են տնտեսական զարգացմանը»,- հավելել է ՆԱՏՕ-ի գլխավոր քարտուղարը։
Նշենք, որ Ստոլտենբերգը Բաքվում բանակցություններ էր անցկացրել նախագահ Իլհամ Ալիևի, ԱԳՆ ու ՊՆ ղեկավարներ՝ Ջեյհուն Բայրամովի և Զաքիր Հասանովի հետ։ Այսօր նա Վրաստան այցից հետո ժամանում է Հայաստան։
