ՄԱԿ-ում նախազգուշացրել են, որ մոտ շաբաթներին Գազայում սով է սպասվում

Գազայի հյուսիսում, հնարավոր է, արդեն սով է, և շրջափակված ողջ անկլավում տարածվելու վտանգ կա՝ 2,2 միլիոն պաղեստինցիների ներքաշելով աշխարհի ամենալայն և ամենածանր պարենային ճգնաժամի մեջ, եթե ռազմական գործողությունները չդադարեցվեն ու առաջին անհրաժեշտության ապրանքները չմատակարարվեն անկլավի բնակիչներին։ Այս մասին ասվսում է ՄԱԿ-ին կից գործող Պարենային անվտանգության փուլերի ինտեգրված դասակարգման (IPC) կազմակերպության կայքում հրապարակված հայտարարության մեջ։

«IPC-ի 2023 թվականի դեկտեմբերի սուր պարենային անապահովության վերլուծությունը նախազգուշացրել է այն ռիսկի մասին, որ սովը կարող է առաջանալ մինչև 2024 թվականի մայիսի վերջը, եթե ռազմական գործողությունների անհապաղ դադարեցում և բնակչության համար հիմնական ապրանքների և ծառայությունների շարունակական հասանելիություն չլինի: Այդ ժամանակից ի վեր սովի կանխարգելման համար անհրաժեշտ պայմանները չեն պահպանվել, և վերջին տվյալները հաստատում են, որ սովը հյուսիսային շրջաններում մոտ է և կանխատեսվում է, որ այն տեղի կունենա 2024 թվականի մարտի կեսերից մինչև մայիս ընկած ժամանակահատվածում»,- ասված է փաստաթղթում։

ՄԱԿ-ը կարծում է, որ ամենահավանական սցենարն այն է, որ Գազայի հատվածի հյուսիսը սովի կմատնվի։ Կազմակերպության հաշվարկներով՝ այս շրջանների 210 հազար բնակիչներ արդեն տառապում են սովից։ Վատագույն սցենարի դեպքում Գազայի հատվածի հարավային մասը նույնպես սովի կմատնվի 2024 թվականի հուլիսին: