«Եվրախորհրդարանը հարձակում է սկսել մեր դեմ»․ Ադրբեջանի Մեջլիսը հայտարարություն է ընդունել

Եվրախորհրդարանի ընդունած բանաձևը ևս մեկ անգամ ցույց է տալիս այս կազմակերպության բացահայտ կողմնակալությունը Ադրբեջանի նկատմամբ։ Այս մասին ասվում է Ադրբեջանի Միլլի Մեջլիսի տարածած հայտարարության մեջ՝ կապված նախօրեին Եվրախորհրդարանի ընդունած «ԵՄ-ի և Հայաստանի միջև կապերի սերտեցման, Հայաստանի ու Ադրբեջանի միջև խաղաղության համաձայնագրի անհրաժեշտության վերաբերյալ» բանաձևի հետ։

«Տպավորություն է ստեղծվում, որ Եվրախորհրդարանն ամբողջությամբ դարձել է հայկական լոբբիի, ադրբեջանատյաց, իսլամատյաց, շովինիստական ​​և ռասիստական ​​ուժերի օրինական ներկայացուցիչը և մոռացել է, որ առաջին հերթին պետք է զբաղվի եվրոպական ժողովուրդների խնդիրներով, նրանց առջև ծառացած մարտահրավերներով»,- ասվում է հայտարարության մեջ։

Նշվում է, որ երկրի «տարածքային ամբողջականության և ինքնիշխանության դեմ ընթացող արշավը ցույց է տալիս, որ Եվրախորհրդարանը հստակ հարձակում է սկսել Ադրբեջանի դեմ՝ մի կողմ դնելով կեղծավորությունն ու երկակիությունը»։

«Բանաձևը պարունակում է բացահայտ սպառնալիքներ և պահանջներ Ադրբեջանի դեմ, ակնհայտ աջակցություն և անջատողականներին վերակենդանացնելու փորձ, Հայաստանի ռազմական սադրանքների արհամարհումը պայմանական սահմանին, ինչպես նաև Ֆրանսիայի գործողությունները, որոնք իրականում միտված են իրավիճակի սրմանը Հարավային Կովկասում, ներկայացնելու իբրև բանակի բարեփոխումներին աջակցություն»,- ասվում է հայտարարության մեջ։

Հավելենք, որ այսօր ավելի վաղ Եվրախորհրդարանի ընդունած բանաձևը քննադատել էր նաև Ադրբեջանի ԱԳՆ-ն։