Հայտնի են Հայաստանի մարմնամարզության առաջնության չեմպիոնները

Ալբերտ Ազարյանի անվան մարզադպրոցում մարտի 12-13-ը կայացել են Հայաստանի սպորտային մարմնամարզության կանանց և տղամարդկանց 2024 թվականի առաջնությունները:

Տղամարդկանց պայքարում առանձին գործիքների եզրափակիչներում լավագույնս հանդես են եկել և ոսկե մեդալներ են նվաճել Գագիկ Խաչիկյանը (նժույգ-թափեր), Գագիկ Խաչատրյանը (ազատ վարժություններ), Վահագն Դավթյանը (օղակներ), Էրիկ Բաղդասարյանը (զուգափայտ), Արթուր Դավթյանը (հենացատկ) և Շեքսպիր Գևորգյանը (պտտաձող):

Կանանց մրցումներում չեմպիոնի կոչմանն արժանացել են Աննա Մանթաշյանը (հավասարակշռության գերան, ազատ վարժություններ), Օֆելյա Քոչարյանը (հենացատկ) և Մանե Պողոսյանը (զուգափայտ) են:

Բազմամարտում Հայաստանի չեմպիոններ են դարձել Գագիկ Խաչիկյանը և Նանե Միքայելյանը:

Հայաստանի մարմնամարզության հավաքականի գլխավոր մարզիչ Հակոբ Սերոբյանի խոսքով՝ Հայաստանի այս առաջնությունը տարբերվել է մյուսներից. մարմնամարզիկները նախապատրաստվում են հաջորդ ամիս Իտալիայում կայանալիք Եվրոպայի առաջնությանն ու Դոհայում անցկացվելիք աշխարհի գավաթի 4-րդ փուլի խաղարկությանը. «Երիտասարդները մասնակցելու են միայն Եվրոպայի առաջնությանը: Ընդ որում, ուրախալին այն է, որ ԵԱ-ին մասնակցող 4-րդ երիտասարդ մարզիկը ընտրվեց հենց այս առաջնության արդյունքներով: Այսինքն, մրցակցություն կա: Սա 2027 թվականին Երևանում կայանալիք Եվրոպայի առաջնության նախապատրաստական փուլի սկիզբն է. ցանկանում ենք տեսնել, թե ինչ հնարավորություններ ունենք թիմային պայքարում»:

Մարզչի խոսքով՝ արդյունքներն ընդհանուր առմամբ գոհացուցիչ են: Հակոբ Սերոբյանն ասում է՝ աշխարհի և Եվրոպայի չեմպիոն, Օլիմպիական խաղերի բրոնզե մեդալակիր Արթուր Դավթյանը հենացատկի վարժությունը նույնությամբ կրկնելու դեպքում առաջիկա մրցաշարերում ևս հաջողություն կունենա: Գոհացնող ելույթներ են ունեցել նաև Վահագն Դավթյանը, Արթուր Ավետիսյանն ու Գագիկ Խաչիկյանը:

Մարզիչը նաև ներկայացրել է Իտալիայում ապրիլի 24-28-ը կայանալիք Եվրոպայի մեծահասակների և երիտասարդների առաջնությանը մասնակցող թիմի կազմը՝

Մեծահասակներ՝ Արթուր Դավթյան, Վահագն Դավթյան, Արթուր Ավետիսյան, Էրիկ Բաղդասարյան, Հարություն Մերդինյան, Գագիկ Խաչիկյան:

Երիտասարդներ՝ Համլետ Մանուկյան, Մամիկոն Խաչատրյան, Ռոբերտ Գյուլումյան, Շեքսպիր Գևորգյան:

Հիշեցնենք՝ մարմնամարզիկներից Փարիզի 2024 թվականի Օլիմպիական խաղերի ուղեգիր է նվաճել միայն Արթուր Դավթյանը: Փարիզ-2024-ի ուղեգրի հնարավորություն է պահպանում նաև Վահագն Դավթյանը, եթե Դոհայում անցկացվելիք աշխարհի գավաթի խաղարկության 4-րդ փուլին առաջին տեղը զբաղեցնի օղակների վարժությունում: