Վստահ ենք, որ ԵՄ-ին անդամակցելու հեռանկարը կարող է դառնալ համազգային կոնսոլիդացիայի եզակի նպատակ.«Հանուն Հանրապետության» կուսակցություն

Լուրեր

22.11.2026 | 01:11
Սերգեյ Ջանջոյան. «Դենիս Ջորկաեֆն արդեն հասցրել է իր իսկ հայտարարած սկզբունքներին դեմ գնալ»
21.11.2026 | 23:51
Դենիս Ջորկաեֆ. «Տեղափոխվում եմ Հայաստան, սովորում եմ հայերեն»
21.11.2026 | 21:28
Դենիս Ջորկաեֆը` ՀՖՖ նախագահի թեկնածու
21.11.2026 | 20:05
3,1 միլիոնի շուրջ կասկածներ․ ինչպե՞ս են հաշվում բնակչության թիվը․ ԱՉՔԻ ՏԱԿ
21.11.2026 | 19:41
GTA VI-ն ռեկորդային վաճառք է գրանցել՝ մեկ օրում ապահովելով 3,79 միլիարդ դոլարի եկամուտ
21.11.2026 | 19:12
Քննարկվել են Հայաստան-Մալթա հարաբերությունների հետագա խորացման հարցեր
21.11.2026 | 19:01
Այսօրվա Երևանն ագրեսիվ քաղաք է, մենք ենք փոխվել, դրան զուգահեռ՝ քաղաքը․ Էմ Կալմուխյան. ՏԵՍԱՆՅՈՒԹ
21.11.2026 | 18:54
Կենտրոնում ամբողջ շաբաթ փոշու պարունակությունը գերազանցել է սահմանային շեմը
21.11.2026 | 18:23
Հայաստանը և Իրանը պայմանավորվել են ընդլայնել համագործակցությունը բարձր տեխնոլոգիաների և նորարարության ոլորտներում
21.11.2026 | 18:02
Փաշինյանն ընդունել է Dell Technologies-ի տարածաշրջանային նախագահին․ քննարկվել են Հայաստանում նոր ներդրումների հնարավորությունները
21.11.2026 | 17:57
Վարչապետը հանդիպում է ունեցել է Խաղաղության Նոբելյան մրցանակակիր Քայլաշ Սաթյարթիի հետ
21.11.2026 | 17:46
ՏԻՄ ընտրությունների նախընտրական փուլում արձանագրվել է 43 միջադեպ և խախտում․ «Անկախ դիտորդ»
21.11.2026 | 17:18
Ինչ եղանակ է սպասվում առաջիկա օրերին
21.11.2026 | 16:54
Ակրոպոլիսի թանգարանում բացվել է հին Հայաստանին նվիրված բացառիկ ցուցահանդես
21.11.2026 | 16:37
Հրդեհ Եղվարդ քաղաքում. հրշեջ-փրկարարները կանխել են հրդեհի տարածումը դեպի հարակից բնակելի տուն
Բոլորը

«Հանուն Հանրապետության» կուսակցության քաղաքական խորհուրդը հայտարարություն է տարածել Եվրամիությանն անդամակցելու վերաբերյալ, որը ներկայացնում ենք ստորև.

«Առաջնորդվելով խարխլված աշխարհակարգի պայմաններում բացառապես Հայաստանի Հանրապետության անվտանգության եւ զարգացման, տարածաշրջանային խաղաղության եւ անվտանգության շահերով,

– Արձանագրելով, որ Հայաստանը եւ Եվրամիությունը ֆիքսել են շահերի, նպատակների եւ արժեքների ընդհանրություն,

– Հաստատելով նաեւ, որ Հայաստանի Անկախության վերականգնումից ի վեր ձեւավորված անվտանգային, պաշտպանական, արտաքին քաղաքական եւ տնտեսական հարաբերությունները Ռուսաստանի Դաշնության հետ՝ ոչ միայն կառուցված են եղել կարճաժամկետ և սխալ հաշվարկված ռազմավարության եւ ակնկալիքների վրա, բերելով Հայաստանում ռուսական ներկայության ընդհուպ վտանգավոր ներսփռման, ռուսական ձեւաչափերում եւ «դաշինքներում» Հայաստանի հնարավորությունների սահմանափակումների եւ թուլացման, ըստ այդմ, վերածվել են արտաքին աշխարհի և գործընկերների հետ նորովի հարաբերություններ կառուցելու ճանապարհին գլխավոր խոչընդոտի եւ գոյաբանական մակարդակի ներքին եւ արտաքին սպառնալիքի,

– Հաշվի առնելով Եվրոպական Միության՝ մինչեւ 2030 թվականը նոր ընդլայնման պատրաստակամությունը եւ մեր հարեւան Վրաստանի Հանրապետությանը ԵՄ անդամակցության թեկնածուի կարգավիճակի հաստատումը, ինչը պատմական հնարավորությունների պատուհան է բացում Հայաստանի Հանրապետության համար,

– Համոզված լինելով, որ Հայաստանի նկատմամբ Ազատության եւ Մարդու Իրավունքների թշնամի՝ ավտորիտար եւ ամբողջատիրական ռեժիմների անօրինական ճնշումներին դիմագրավելը օրվա հրամայական է,
Բացարձակ համոզմունք ենք հայտնում առ այն, որ․

1․ Հետայսու Հայաստանի Հանրապետության քաղաքականության բոլոր ներքին եւ արտաքին ոլորտային բարեփոխական օրակարգերը պետք է ենթարկվեն մեկ ռազմավարական նպատակին՝ Հայաստանի լիիրավ անդամակցությանը Եվրոպական Միությանը մինչեւ 2030 թվականը, ինչը նշանակում է․ լիակատար ներդաշնակեցում Եվրոպական ստանդարտներին եւ Եվրամիության ընդհանուր քաղաքականությանը։

2․ Այդ ռազմավարական նպատակը ոչ միայն լիարժեքորեն համահունչ է Հայաստանի՝ տարածաշրջանում տեւական, համապարփակ եւ արժանապատիվ խաղաղության հաստատման օրակարգին, այլեւ բխում է Եվրամիության ստեղծման հիմքում ի սկզբանե դրված գաղափարից՝ ձեւավորել ընդհանուր արժեքային հենք եւ տնտեսական շահ, ինչի վրա հիմնվելով Եվրոպական ազգերը հաղթահարեցին դարերով կուտակված սահմանային վեճերը եւ ազգամիջյան թշնամանքը երկու համաշխարհային պատերազմներից հետո։

3․ Բոլոր քաղաքական ուժերը, քաղաքականապես ակտիվ հասարակական շերտերը եւ շրջանակները հայտնեն իրենց հստակ դիրքորոշումը Հայաստանի կողմից Եվրամիությանը լիիրավ անդամակցության հայտի շուտափույթ ներկայացման վերաբերյալ։

Վստահ ենք, որ Եվրամիությանն անդամակցելու հեռանկարը կարող է դառնալ համազգային կոնսոլիդացիայի եզակի նպատակ։ Ելնելով վերոնշյալից, Հանուն Հանրապետության Կուսակցությունն իր պատրաստակամությունն է հայտնում ամենաակտիվ կերպով նախաձեռնել հասարակական-քաղաքական քննարկումներ եւ մասնակցել դրանց տարբեր ֆորմատներով, նպատակ դնելով հասնել ամենալայն ազգային կոնսոլիդացիայի՝ մեր պետականության համար կենսական կարեւորության այս ռազմավարական նպատակն իրականություն դարձնելու համար»,- ասված է հաղորդագրության մեջ։