Ադրբեջանն Իսրայելից Sky Dew աերոստատ է գնել

Ադրբեջանն Իսրայելից գնել է Sky Dew աերոստատ, որը հագեցած է հրթիռների ու ինքնաթիռների հայտնաբերման առաջատար համակարգով։ Այս մասին հայտնում են ադրբեջանական ԶԼՄ-ները՝ վկայակոչելով իսրայելական լրատվամիջոցներին։

Sky Dew-ի խնդիրն է՝ հայտնաբերել թևավոր հրթիռներ, անօդաչու սարքեր և այլ առաջադեմ օդային սպառնալիքներ, որոնք թռչում են ցածր բարձրության վրա և նախազգուշացնել: Այդ նպատակով այն հագեցած է հեռահար AFAR ռադարով։ Այն ի վիճակի է շարունակական հսկողություն ապահովել մի քանի օրվա ընթացքում և ունակ է հետևել մինչև 500 թիրախի՝ ավելի քան 250 կմ հայտնաբերման հեռահարությամբ։

Աերոստատի բարձրության վերին սահմանը զգալիորեն գերազանցում է ցամաքային ռադարների սահմանները՝ ապահովելով տեսանելիության ավելի մեծ տիրույթ դեպի հորիզոն:

Sky Dew աերոստատն իր տեսակի մեջ ամենախոշորներից է և մշակվել է Իսրայելի հակահրթիռային պաշտպանության ձեռնարկության և ԱՄՆ-ի հակահրթիռային պաշտպանության գործակալության կողմից: Նշվում է, որ տեղակայված զգայուն ռադարը ոչ միայն ռեսուրսներով համեմատաբար խնայող է, այլև դիմացկուն և թանկ սպասարկում չի պահանջում։

Քանի որ այս համակարգը մշակվել է ԱՄՆ-ի հետ, ամենայն հավանականությամբ, դրա վաճառքի համար պահանջվում է նաև Միացյալ Նահանգների հավանությունը։

Դեռևս նախորդ տարեվերջին էլ տեղեկություններ էին տարածվել, որ Ադրբեջանն Իսրայելից գնելու է հավելյալ Barak MX հակաօդային պաշտպանության համակարգեր։ Գործարքի արժեքը կկազմի 1,2 միլիարդ դոլար:

Էմմա Չոբանյան