Քաղաքականություն
09.03.2024 | 13:17
Անթալիայի դիվանագիտական ֆորումին մասնակցության շրջանակներում ՀՀ ԱԳ նախարար Արարատ Միրզոյանը հարցազրույց է տվել թուրքական «TRT World» հեռուստաալիքին։ Անդրադարձ է կատարվել ՀՀ արտաքին քաղաքական մի շարք հարցերի, այդ թվում՝ ԱՄՆ, ԵՄ հետ հարաբերություններին, Հարավային Կովկասում անվտանգային իրավիճակին, հայ-թուրքական հարաբերությունների կարգավորման գործընթացին, Հայաստանի և Ադրբեջանի միջև բանակցային գործընթացում առկա առանցքային հարցերին։
Հարց. Ի՞նչ կցանկանայիք փոխել ՄԱԿ Անվտանգության խորհրդի կամ ՄԱԿ համակարգի այլ մեխանիզմներում՝ ձևավորելու ավելի արդար համակարգ։ ՄԱԿ-ը կոչված է լինելու հակամարտությունների կարգավորման, խաղաղության կենտրոն։ Ինչպե՞ս եք տեսնում դրա վերափոխումն այդ նպատակին ծառայեցնելու համար։ Ո՞րն է բացակայող բաղադրիչը։
Պատասխան. Բացակայող բաղադրիչը հարկադրումն է՝ բանաձևերի, որոշումների, այդ թվում՝ Արդարադատության միջազգային դատարանի որոշումների կյանքի կոչումը։ Մեր պարագայում ևս, ընդունվել են բանաձևեր, դատարանի որոշումներ, սակայն մենք չենք տեսնում դրանց իրականացումը տեղում՝ գետնի վրա։ Միջազգային իրավակարգը պատշաճորեն չի գործում և բացակայող բաղադրիչը գուցե հենց հարկադրումն է, դրանց իրականացումը։
Նկատենք, որ թուրք լրագրողի կողմից այս հարցի ձևակերպումը պայմանավորված է Թուրքիայի առաջնորդ Ռեջեփ Թայիփ Էրդողանի՝ ՄԱԿ ԱԽ-ի գործունեության նկատմամբ կանխակալ վերաբերմունքով։
Բանն այն է, որ Էրդողանն իր «Աշխարհը մեծ է հինգից» գրքում խոսում է այն մասին, որ աշխարհի կառավարումը չպետք է սահմանափակվի ՄԱԿ-ի Անվտանգության խորհրդի մշտական անդամ հինգ պետությունների որոշումներով (ԱՄՆ, Ռուսաստանի Դաշնություն, Միացյալ Թագավորություն, Ֆրանսիա, Չինաստան)։
Ըստ Էրդողանի՝ ՄԱԿ ԱԽ-ի ներկայիս կառուցվածքը աշխարհի գլխավոր անարդարությունների պատճառն է։ ՄԱԿ ԱԽ-ում ներկայացված են Եվրոպան, Ասիան և ԱՄՆ-ը, Աֆրիկան չկա ու անարդար է։ Բացի Չինաստանից մյուս պետությունները քրիստոնեական են, մինչդեռ մուսուլմաններն աշխարհի 1/4-ն են կազմում։
Էրդողանն առաջարկում է 20 անդամից կազմված ՄԱԿ ԱԽ, որը չպետք է ունենա մշտական անդամ։ Նաև առաջարկում է հանել վետոյի ինստիտուտը։
