Քաղաքականություն
08.03.2024 | 13:46
«Հայաստանի տարածքում Ադրբեջանի իսլամական պատմամշակութային ժառանգության ոչնչացումը մեծ հիասթափություն է առաջացնում»,- հայտարարել է Իլհամ Ալիևը Բաքվում անցկացվող «Բազմազանության պաշտպանություն. Իսլամաֆոբիայի դեմ պայքարը 2024 թ.-ին» համաժողովի ժամանակ։ Ըստ Ադրբեջանի նախագահի՝ իրենք դիմել են ՅՈՒՆԵՍԿՕ-ին՝ տեխնիկական առաքելություն ուղարկելու Հայաստան՝ «գնահատելու ադրբեջանական մշակութային և կրոնական հուշարձանների վիճակը, որոնք տարիներ շարունակ ոչնչացվել են այս երկրում»։
«Ցավոք, ՅՈՒՆԵՍԿՕ-ն դեռ չի արձագանքել այս կոչին»,-ասել է Ալիևը։
Ադրբեջանի նախագահի այս մեղադրանքը հնչում է հատկապես վերջին օրերին ակտիվացած հայկական մշակութային ժառանգության տարբեր օբյեկտների ոչնչացման ֆոնին։ Օրերս Ադրբեջանի պետական AZ TV-ն հայատյաց բնորոշումներով ցուցադրում էր, թե ինչպես են քանդում Արցախի խորհրդարանի շենքը։
Թեպետ ՄԱԿ-ի Արդարադատության միջազգային դատարանի որոշմամբ՝ Բաքուն պետք է քայլեր ձեռնարկի պետական մակարդակով հայատյաց քաղաքականությունը դադարեցնելու, այնուամենայնիվ, այն շարունակվում է։
Հիշեցնենք, որ 2020 թ․-ի 44-օրյա պատերազմից հետո Բաքուն այդպես էլ թույլ չի տալիս ՅՈՒՆԵՍԿՕ-ի առաքելությանը մուտք գործել Արցախ՝ գնահատելու հայկական պատմամշակութային հուշարձանների իրավիճակը։
Էմմա Չոբանյան
