Քաղաքականություն
05.03.2024 | 19:58
Թուրքիայի ընդդիմադիր Ժողովրդահանրապետական կուսակցության (CHP) նախկին նախագահներից, երկրի նախկին ԱԳ նախարար, քրդական արմատներով Հիքմեթ Չեթինը Artı TV-ի եթերում անդրադարձել է նաև Դերսիմի ջարդերին և 1915 թվականի Հայոց ցեղասպանությանը։
«Եղել են շատ տխուր իրադարձություններ։ Եթե ասեին՝ «Ներողություն ենք խնդրում», գուցե, այս հարցն այսքան մեծ չլիներ»,- ասել է նա՝ հավելելով, որ 1991 թվականին քուրդ քաղաքական գործիչներին կուսակցությունից հեռացնելը բեկումնային կետ է եղել։
Չեթինը հայտարարել է, որ Թուրքիայի Հանրապետության հիմնադիր Մուստաֆա Քեմալ Աթաթուրքը «մեծ հեղափոխական էր, սակայն այդ ժամանակ որոշ սխալներ է թույլ տվել»։
«Օրինակ՝ ինչպես 1915 թվականի հայկական իրադարձությունները, երբ ստեղծվեց Հանրապետությունը։ Ես չգիտեմ, թե ինչու նրանք չկարողացան դա անել: Շատ տխուր իրադարձություններ են եղել։ Ներողություն խնդրելը չի նշանակի պարտություն: Դուք կարող եք օգտագործել ներողություն խնդրելու գործիքը: Երբ դա անհրաժեշտ էր, մենք չկարողացանք»,- հայտարարել է Թուրքիայի նախկին ԱԳ նախարարը։
Էմմա Չոբանյան
