Քաղաքականություն
01.03.2024 | 18:41
Անթալիայում ընթացող 3-րդ դիվանագիտական ֆորումի շրջանակներում տեղի է ունեցել ՌԴ ԱԳ նախարար Սերգեյ Լավրովի հանդիպումը Ադրբեջանի ԱԳ նախարար Ջեյհուն Բայրամովի հետ։ Ադրբեջանական լրատվամիջոցները՝ վկայակորչելով Ադրբեջանի ԱԳՆ-ին հայտնում են, որ կողմերը քննարկել են նաև տարածաշրջանում իրավիճակը։
«Անթալիայում դիվանագիտական ֆորումի շրջանակներում տեղի է ունեցել Ադրբեջանի և Ռուսաստանի արտաքին գործերի նախարարներ Ջեյհուն Բայրամովի և Սերգեյ Լավրովի հանդիպումը, որի ընթացքում քննարկվել են Ադրբեջանի և Ռուսաստանի երկկողմ և բազմակողմ համագործակցությունը, ինչպես նաև՝ հետկոնֆլիկտային իրավիճակը տարածաշրջանում»,-ասվում է հաղորդագրության մեջ։
ՌԴ ԱԳՆ փոխանցմամբ կողմերը հայտարարել են Մոսկվայի, Բաքվի և Երևանի միջև եռակողմ պայմանավորվածությունների իրականացման անհրաժեշտության մասին։
«Արտաքին գործերի գերատեսչությունների ղեկավարները քննարկել են երկկողմ հարաբերությունների հետագա զարգացման իրավիճակը և հեռանկարները՝ Ռուսաստանի Դաշնության և Ադրբեջանի Հանրապետության 2022 թվականի փետրվարի 22-ի դաշնակցային համագործակցության մասին հռչակագրի դրույթներին համապատասխան։ Հաստատվել է 2020-2022 թվականների համար Ռուսաստանի, Ադրբեջանի և Հայաստանի ղեկավարների միջև եռակողմ համաձայնագրերի իրականացման անհրաժեշտությունը»,-ասվում է հայտարարության մեջ։
Նշվում է, որ «ընդգծվել է բազմակողմ տարբեր ձևաչափերում՝ ներառյալ Կասպյան հնգյակի և «3+3» խորհրդատվական տարածաշրջանային պլատֆորմի շրջանակներում համատեղ աշխատանքը շարունակելու հանձնառությունը»։
