Ռուբինյանն Անթալիայի ֆորումում մասնակցում է Հարավային Կովկասին նվիրված քննարկմանը. ՈՒՂԻՂ

Անթալիա քաղաքում մեկնարկած դիվանագիտական 3-րդ համաժողովում տեղի է ունենում «Խաղաղություն, զարգացում և փոխկապակցվածություն Հարավային Կովկասում» պանելային քննարկումը, որին մասնակցում է ՀՀ Աժ փոխնախագահ,  Թուրքիայի հետ հարաբերությունների կարգավորման հատուկ բանագնաց Ռուբեն Ռուբինյանը։

Նրա հետ միասին քննարկմանը մասնակցում են  Հայաստանի հետ հարաբերությունների կարգավորման հարցով Թուրքիայի բանագնաց Սերդար Քըլըչը,  Ադրբեջանի նախագահի օգնական Հիքմեթ Հաջիևը,  Հարավային Կովկասի հարցերով ԵՄ հատուկ ներկայացուցիչ Տոյվո Կլաարը։

Թուրքական լրատվամիջոցների հաղորդմամբ՝  եռօրյա համաժողովին մասնակցում են  19 պետությունների և կառավարությունների ղեկավարներ, 73 նախարարներ 147 երկրներից: Մարտի 1-3-ը անցկացվող դիվանագիտական ֆորումին մասնակցում է նաև ՀՀ ԱԳ նախարար Արարատ Միրզոյանը։ Ի դեպ, Հայաստանի ԱԳ նախարարը ֆորումին առաջին անգամ մասնակցել էր 2022թ-ին։

Անթալիայի 3-րդ դիվանագիտական ​​ֆորումում անվտանգության միջոցառումները բարձրացվել են ամենաբարձր մակարդակի։ Բազմաթիվ կետերում հերթապահում են մեծ թվով ոստիկաններ։ Ֆորումը կհյուրընկալի,  ընդհանուր առմամբ, 4 հազար հյուրերի։ Բաց նիստերը անցկացվելու են ավելի քան 50 տարբեր ձևաչափերով:

Ֆորումի հիմնական թեման է լինելու «Ճգնաժամերի ժամանակ դիվանագիտության առաջմղումը»։ Քննարկվելու են  գլոբալ ճգնաժամերը, ինչպես նաև կլիմայի փոփոխությունը, միգրացիան,  առևտրային պատերազմները և արհեստական ​​ինտելեկտը և այլն։

Էմմա Չոբանյան