Նավալնիին պատրաստվում էին փոխանակել Գերմանիայում սպանության համար դատապարտված Վադիմ Կրասիկովի հետ

Ռուս ընդդմադիր գործիչ Ալեքսեյ Նավալնին մահացել է անմիջապես այն բանից հետո, երբ համաձայնություն է ձեռք բերվել նրան փոխանակել մարդասպան Վադիմ Կրասիկովի հետ, որը դատապարտվել է Գերմանիայում սպանության համար։ Այս մասին հայտնել է Նավալնիի համախոհ Մարիա Պևչին, գրում է Current Time-ը։

«Առաջիկա օրերին Նավալնին պետք է ազատության մեջ լիներ, քանի որ մենք հասել էինք նրա փոխանակման մասին որոշմանը։ Փետրվարի սկզբին Պուտինին առաջարկվեց մարդասպան Վադիմ Կրասիկովին, որը պատիժ է կրում Բեռլինում սպանության համար, փոխանակել ԱՄՆ երկու քաղաքացիների և Ալեքսեյ Նավալնիի հետ։ Ես փետրվարի 15-ին հաստատում եմ ստացել, որ բանակցություններն ընթանում են և ավարտական փուլում են։ Փետրվարի 16-ին Ալեքսեյ Նավալնին սպանվել է»,- հայտարարել է Պևչին իր տեսաուղերձում։

Պաշտոնական հաստատում չկա, որ նման փոխանակում է նախապատրաստվում, սակայն Պուտինն ավելի վաղ Թակեր Կառլսոնին տված հարցազրույցում հայտարարել էր, որ պատրաստ է քննարկել Ռուսաստանում լրտեսության մեջ մեղադրվող ամերիկացի լրագրող Էվան Գերշկովիչին Կրասիկովի հետ փոխանակելու հարցը։

Քաղաքական գործչի համախոհներից մեկի խոսքով՝ Նավալնիին ուղղակիորեն հնարավոր չէր փոխանակել, քանի որ նա Ռուսաստանի քաղաքացի է, և օտարերկրյա պետությունները պարտավոր չէին պաշտպանել նրա իրավունքները։ Սակայն երկու տարի առաջ, ըստ Պևչիի, իր թիմը գտել է ելքը, այսպես կոչված, մարդասիրական փոխանակումը՝ «ռուս լրտեսները՝ քաղբանտարկյալների դիմաց»։

Հիշեցնենք՝ Ռուսաստանի Յամալո-Նենեց ինքնավար շրջանի դաշնային քրեակատարողական ծառայությունը փետրվարի 16-ին հայտարարեց Նավալնիի մահվան մասին։ Գերատեսչության տվյալներով՝ քաղաքական գործիչը «զբոսանքից հետո իրեն վատ է զգացել՝ գրեթե անմիջապես կորցնելով գիտակցությունը»։ Վերակենդանացման միջոցառումները արդյունք չեն տվել։

Ալեքսեյ Նավալնիի մահից հետո անհայտ էր դիակի գտնվելու վայրը։ Միայն մեկ շաբաթ անց Լյուդմիլա Նավալնայան կարողացել է տեսնել որդու մարմինը։ Քննիչները քաղաքական գործչի մորն ասել են, որ մարմինը չեն հանձնի երկու շաբաթ, քանի որ այն, իբր, ուղարկվել է քիմիական փորձաքննության։ Նավալնայան բողոք է ներկայացրել Քննչական կոմիտեի գործողությունների դեմ, իսկ արտերկրում գտնվող տասնյակ հայտնի ռուս հասարակական գործիչներ հանդես են եկել քաղաքական գործչի մարմինը մորը վերադարձնելու պահանջով։

Ի վերջո, փետրվարի 24-ին Նավալնիի մարմինը հանձնվել է մորը։

«Հուղարկավորությունը դեռ առջևում է: Մենք չգիտենք՝ արդյո՞ք իշխանությունները կխոչընդոտեն, որ այն անցկացվի այնպես, ինչպես ընտանիքն է ցանկանում և ինչպես արժանի է Ալեքսեյը: Մենք տեղեկությունը կհայտնենք, երբ այն հասանելի լինի»,- ասել է քաղաքական գործչի մամուլի քարտուղար Կիրա Յարմիշը: