04.04.2026 | 10:46
Լարս ավտոճանապարհը բաց է
ԱՊՀ երկրների կառավարությունների ղեկավարների խորհրդի նիստը տեղի կունենա մայիսին
Քաղաքականություն
26.02.2024 | 16:45
Մայիսի 24-ին Թուրքմենստանի մայրաքաղաք Աշխաբադում տեղի կունենա ԱՊՀ անդամ երկրների կառավարությունների ղեկավարների խորհրդի նիստը, հայտնում է Համագործակցության գործադիր կոմիտեի մամուլի ծառայությունը։
«Համագործակցության անդամ երկրների մշտական լիազոր ներկայացուցիչների խորհրդի անդամները [փետրվարի 27-ին Մինսկում կայանալիք հանդիպման ժամանակ] կքննարկեն ԱՊՀ կառավարությունների ղեկավարների խորհրդի հաջորդ նիստի օրակարգի նախագծի առաջարկները, որը տեղի կունենա մայիսի 24-ին Աշխաբադում»,- ասված է հաղորդագրության մեջ։
Մշտական ներկայացուցիչները կքննարկեն նաև այն նախաձեռնությունների իրականացման ճանապարհային քարտեզի կատարումը, որոնք Պետությունների ղեկավարների խորհրդի, Կառավարությունների ղեկավարների խորհրդի, Արտաքին գործերի նախարարների խորհրդի և ԱՊՀ տնտեսական խորհրդի նիստերի ընթացքում արտահայտել են պատվիրակությունների ղեկավարներն անվտանգության ոլորտում համագործակցության առումով, կամփոփեն 2023 թվականին Համագործակցության շրջանակում արտաքին քաղաքական համագործակցության արդյունքները՝ ԱՊՀ միջազգային դիրքավորման համատեքստում։
ԱՊՀ կառավարությունների ղեկավարների խորհրդի նախորդ նիստը տեղի է ունեցել 2023 թվականի հոկտեմբերի վերջին Բիշքեկում, որին մասնակցել են Ռուսաստանի, Բելառուսի, Ղրղզստանի, Ղազախստանի, Ուզբեկստանի, Տաջիկստանի կառավարությունների ղեկավարները, Հայաստանի, Ադրբեջանի և Թուրքմենստանի փոխվարչապետները, ինչպես նաև Եվրասիական տնտեսական միության և Համագործակցության Գործադիր կոմիտեի կառույցների ներկայացուցիչները:
