Բայրամովը հայտարարել է, թե ԵՄ առաքելության գործողությունները սահմանին «լարվածություն են ստեղծում»՝ դժգոհելով ԵՄ-ից ու Ֆրանսիայից

Ադրբեջանի ԱԳ նախարար Ջեյհուն Բայրամովը հերթական անգամ դժգոհություն է հայտնել ՀՀ-ում տեղակայված ԵՄ դիտորդական առաքելությունից ու Ֆրանսիայից։ Լրագրողների հետ զրույցում նա, մասնավորապես, հայտարարել է, որ ՀՀ-ում տեղակայված ԵՄ քաղաքացիական դիտորդական առաքելությունը, իբր, սահմանին լարվածություն է ստեղծում՝ ևս մեկ անգամ ընդգծելով, որ Բաքվի սրտով չեն սահման արևմտյան տարբեր դիվանագետների ու պաշտոնյաների այցերը, որոնք դիտարկում են  իրավիճակն ու Ադրբեջանի կողմից Հայաստանի ինքնիշխան տարածքների օկուպացիան։

«Սահմանին ԵՄ առաքելության գործողությունները, արևմտյան տարբեր դիվանագետների ներգրավումը և այն, որ հարցն անընդհատ օրակարգում էր, երբ սահմանին լարվածություն չկար, ծառայել են իրավիճակը լարված ներկայացնելուն։ Դրա օրինակն է այս առաքելության վերահսկողության գոտուց ադրբեջանական սահմանի խախտումը, այնուհետև առանց պատճառի դիպուկահարի կրակոցից մեր զինծառայողի վիրավորումը»,- հայտարարել է Բայրամովը։

Միաժամանակ, նա Ֆրանսիային է մեղադրել, իբր, իրավիճակը սրելու համար՝ «սադրիչ» որակելով Ֆրանսիայի նախագահ Էմանուել Մակրոնի հայտարարությունները, ինչպես նաև Ֆրանսիայի պաշտպանության նախարարի այցը Հայաստան։

Հիշեցնենք՝ Մյունխենում տեղի ունեցած Հայաստանի, Ադրբեջանի և Գերմանիայի ղեկավարների հանդիպումից հետո Իլհամ Ալիևը շտապել էր Թուրքիա՝ նախագահ Ռեջեփ Թայիփ Էրդողանի հետ հանդիպման։ Ալիևը հայտարարել էր, որ Անկարան ու Բաքուն զարգացնելու են ռազմական ոլորտում սերտ համագործակցությունը, իսկ երկու երկրների բանակները գործում են որպես «մեկ բռունցք»։

Ավելի վաղ էլ՝ սահմանին ադրբեջանական վերջին սադրանքից, Ադրբեջանի ԱԳՆ-ն էր կանչվել Բաքվում ԵՄ դեսպան Պետեր Միխալկոն։ Հանդիպմանը նշվել էր, որ, իբր, «Հայաստանում ԵՄ դիտորդական առաքելության գործունեությունը, հակառակ ձեռք բերված նախնական պայմանավորվածությունների, լուրջ մտահոգություն է առաջացրել և լայնորեն օգտագործվել է որպես Ադրբեջանի դեմ քարոզչության միջոց՝ հակառակ տարածաշրջանային կայունության և Ադրբեջանի ու Հայաստանի միջև վստահության ամրապնդմանը նպաստելու հայտարարված նպատակների»։