09.04.2026 | 23:32
Պուտինը հայտարարել է «զատկական հրադադար»
Ինչ առողջական վիճակում է եղել Նավալնին․ նրա վերջին ելույթը` մահից մեկ օր առաջ․ ՏԵՍԱՆՅՈՒԹ
Քաղաքականություն
16.02.2024 | 17:52
Որն է եղել ռուս ընդդիմադիր քաղաքական գործիչ Ալեքսեյ Նավալնիի մահվան պատճառն ու ինչպիսի առողջական վիճակում է նա եղել։ Յամալ-Նենեց ինքնավար օկրուգի դաշնային քրեակատարողական ծառայության կայքում քաղաքական գործչի մահվան մասին հաղորդագրությունում պատճառները չեն նշվում։ Դրանում միայն ասվում է, որ զբոսանքից հետո Նավալնին իրեն վատ է զգացել և կորցրել գիտակցությունը, իսկ վերակենդանացման միջոցառումները դրական արդյունք չեն տվել։ Սակայն RT-ի աղբյուրը պնդում է, որ Նավալնիի մահը գրանցվել է պոկված թրոմբի պատճառով, գրում է Current time-ը։
Դրանից անմիջապես հետո Յամալ-Նենեց ինքնավար օկրուգի հասարակական մոնիթորինգի հանձնաժողովի նախագահ Դանիլա Գոնտարը «Ինտերֆաքս»-ին ասել է, որ Նավալնիից բողոքներ չեն ստացել, այդ թվում՝ առողջության հետ կապված։
SOTAvision-ը տեսանյութ է հրապարակել երեկ անցկացված դատական նիստից, որին տեսակապով մասնակցել է նաև Ալեքսեյ Նավալնին։ Տեսանյութում նա հիվանդ տեսք չունի, խոսում է վստահ, ժպտում ու կատակում։
Իրավապաշտպան և լրագրող Եվա Մերկաչևան, որը 12 տարի աշխատել է Մոսկվայի հանրային մոնիթորինգի հանձնաժողովում, կարծում է, որ քաղաքական գործչի առողջությունը կարող էր խաթարվել մշտապես պատժախցում մնալու պատճառով։
«Կարծում եմ, որ դրան կարող էր հանգեցնել անվերջ պատժախուց տեղափոխվելը, այսինքն՝ նա եղել է այնտեղ մեկ, երկու, երեք անգամ, իսկ պատժախցում գտնվելու դեպքերի թիվը պարզապես արդեն մի քանի տասնյակի էր հասել։ Պատժախուցը կալանավորման շատ ծանր պայման է։ Մարդիկ, ըստ էության, այնտեղ ավելի հաճախ են սառչում, ավելի հաճախ են սովամահ լինում»,- ասել է Մերկաչովան։
Ի դեպ, Նավալնին ավելի քան 300 օր անցկացրել է պատժախցում։
Նավալնիի փաստաբաններն ու համախոհները դեռևս չեն հաստատել նրա մահվան փաստը։
Մանրամասները՝ տեսանյութում:
