12.08.2026 | 10:13
Մեր աշակերտները արհեստական բանականության միջազգային օլիմպիադայում թիմային պայքարում 5-րդ տեղն է զբաղեցրել. ԿԳՄՍ նախարար
Լատվիայի նախագահը Նավալնիի մահը Կրեմլի կողմից իրականացված սպանություն է անվանել
Քաղաքականություն
16.02.2024 | 17:36
Լատվիայի նախագահ Էդգար Ռինկևիչը ռուս ընդդիմադիր գործիչ Ալեքսեյ Նավալնիի մահն անվանել է Կրեմլի կողմից իրականացված սպանություն։ Այս մասին նա հայտարարել է X-ի միկրոբլոգում արված գրառման մեջ։
«Ինչ էլ որ մտածեք Ալեքսեյ Նավալնիի մասին՝ որպես քաղաքական գործչի, նա ուղղակի դաժանորեն սպանվեց Կրեմլի կողմից: Սա փաստ է, և սա այն է, ինչ դուք պետք է իմանաք Ռուսաստանի ներկայիս ռեժիմի իրական էության մասին: Ցավակցում եմ նրա ընտանիքին և ընկերներին»,- ասված է Էդգար Ռինկևիչի հայտարարության մեջ:
Հիշեցնենք՝ այսօր Յամալո-Նենեց ինքնավար օկրուգի դաշնային քրեակատարողական ծառայությունը հայտնել է բանտում ընդդիմադրի մահվան մասին։ Ըստ այդ տեղեկությունների՝ Նավալնին իրեն վատ է զգացել Յամալ-Նենեց ինքնավար օկրուգում զբոսանքից հետո՝ գրեթե անմիջապես կորցնելով գիտակցությունը։ Նշվում է, որ շտապօգնության բժիշկները հաստատել են դատապարտյալի մահը։ Նավալնիի փաստաբաններն ու համախոհները դեռ չեն հաստատել նրա մահը։ Նրա փաստաբան մեկնել է Խարպի գաղութ։
Թունավորման հետևանքներից երկարատև բուժումից հետո 2021 թվականի հունվարի 17-ին Ալեքսեյ Նավալնին Գերմանիայից վերադարձավ Ռուսաստան։ Ընդդիմադիր գործչին բերման ենթարկեցին հենց Մոսկվայի օդանավակայանից։ Այդ ժամանակից Նավալնին բանտում է։ Նա մեղավոր է ճանաչվել երեք գործերով և դատապարտվել երկարաժամկետ ազատազրկման։
Նավալնիի հիմնադրած քաղաքական կառույցները Ռուսաստանի իշխանությունների կողմից ճանաչվել են «ծայրահեղական կազմակերպություններ», իսկ Նավալնիի հարյուրավոր համախոհներ կա՛մ ենթարկվել են քրեական հետապնդման, կա՛մ ստիպված են եղել լքել Ռուսաստանը: Ընդդիմադիր գործչին առնչվող ևս մի քանի քրեական գործ քննության փուլում է։ Նավալնիին սպառնում էր ցմահ ազատազրկում։
