28.04.2026 | 10:46
Հայաստանը 2026-ի աշնանից կունենա նոր կենսաչափական անձնագրեր և նույնականացման քարտեր
Թուրքիան ու Հունաստանը կմիանան հակահրթիռային պաշտպանության «Եվրոպական երկնքի վահան» նախագծին
Քաղաքականություն
16.02.2024 | 14:20
Թուրքիան և Հունաստանը պաշտոնապես կմիանան Գերմանիայի գլխավորած հակահրթիռային պաշտպանության նախագծին, որը կոչվում է «Եվրոպական երկնքի վահան»։ Այս մասին հայտարարել է Գերմանիայի պաշտպանության նախարար Բորիս Պիստորիուսը, գրում է Bloomberg-ը։ Այսպիսով՝ նախաձեռնության անդամների թիվը հասել է 21-ի։
«Սա զգալի թիվ է այսքան կարճ ժամանակում», – Բրյուսելում ՆԱՏՕ-ի իր գործընկերների հետ հանդիպումից առաջ ասել է Պիստորիուսը լրագրողների հետ զրույցում: Հաղորդվում է, որ Հունաստանի ՊՆ ղեկավար Նիկոս Դենդիասը և Թուրքիայի ՊՆ ղեկավար Յաշար Գյուլերը ստորագրել են համապատասխան փաստաթղթերը։
Բեռլինի կողմից Եվրոպայի հակաօդային պաշտպանության ամրապնդմանն ուղղված այս ջանքերի մասին առաջին անգամ հայտարարել էր Գերմանիայի կանցլեր Օլաֆ Շոլցը Պրահայում 2022 թվականի օգոստոսին ունեցած ելույթում: Նախագծում ընդգրկված են երկրներ, որոնք համատեղ գնում են հակաօդային և հակահրթիռային պաշտպանության համակարգեր և կոչված են բարելավելու ծախսերի արդյունավետությունը և ճկունությունը:
Սակայն այս քայլը վրդովվեցրել է Ֆրանսիային, որը չի միացել նախաձեռնությանը․ Փարիզը ցանկանում է, որ եվրոպական երկրները գնեն եվրոպական արտադրության համակարգեր, այլ ոչ թե ապավինեն ԱՄՆ-ում և Իսրայելում արտադրված համակարգերին:
