28.04.2026 | 13:17
Ինդոնեզիայում գնացքի վթարի հետևանքով զոհվել է 14 մարդ, ավելի քան 80-ը՝ վիրավորվել
Պաշտոնական Բաքուն որոշել է ճանաչել «Թալիբան»-ը
Քաղաքականություն
15.02.2024 | 16:44
Աֆղանստանում Ադրբեջանի դեսպան Իլհամ Մամեդովը Քաբուլում դեսպանատան բացման վերաբերյալ պաշտոնական նամակ է փոխանցել «Թալիբան»-ի կառավարության ԱԳՆ։ Ադրբեջանական լրատվամիջոցների հաղորդմամբ՝ այս մասին X-ի իր էջում հայտնել է գերատեսչության մամուլի քարտուղար Աբդուլ Քահար Բալխին։
Նրա խոսքով՝ Ադրբեջանի դեսպան Իլհամ Մամեդովը Քաբուլում հանդիպել է թալիբների կառավարության արտաքին գործերի նախարար Ամիր Խան Մութթաքիի հետ։ Հանդիպմանը Մամեդովը պաշտոնական նամակ է ներկայացրել Քաբուլում Ադրբեջանի դեսպանատան բացման վերաբերյալ։
Դեռևս նախորդ տարվա վերջին Ադրբեջանի ԱԳ նախարար Ջեյհուն Բայրամովը հայտարարել էր, որ Բաքուն պատրաստվում է 2024 թվականին Աֆղանստանում դեսպանատուն բացել։
Նշենք, որ ՄԱԿ-ի Անվտանգության խորհուրդը դեռևս 2003 թվականին «Թալիբան»-ը ճանաչել է ահաբեկչական կազմակերպություն։ Այն ահաբեկչական են ճանաչում արևմտյան երկրները։
2021 թվականին Աֆղանստանից ՆԱՏՕ-ի զորքերի դուրսբերմանը զուգահեռ՝ թալիբները գրավեցին նշանակալի տարածքներ ամբողջ երկրում։ Աֆղանստանի տարածքի ճնշող մեծամասնությունը, այդ թվում՝ մայրաքաղաք Քաբուլը, այժմ գտնվում է թալիբների վերահսկողության ներքո։
Ի դեպ, ադրբեջանցի զինվորականները մասնակցել են Աֆղանստանում միջազգային հակաահաբեկչական գործողությանը և թուրք զինվորականների հետ վերջիններից են լքել երկիրը թալիբների կողմից իշխանությունը գրավելուց հետո:
Էմմա Չոբանյան
