17.12.2025 | 16:05
ՆԱՏՕ-ի գլխավոր քարտուղարի տեղակալը վաղը Հայաստան կայցելի
ՀԱՊԿ-ում մնալն ու քննարկումներին լիարժեք վերադարձը ՀՀ-ի շահերից է բխում․ Գալուզին
Քաղաքականություն
15.02.2024 | 15:21
ՌԴ ԱԳ փոխնախարար Միխայիլ Գալուզինը «Իզվեստիա»-ին տված հարցազրույցում անդրադարձել է նաև Հայաստանի և ՀԱՊԿ-ի հարաբերություններին, մասնավորապես, հարցին՝ արդյո՞ք ժամանակի ընթացքում Երևանը կարող է կառույցից դուրս գալ։ Գալուզինը խոսել է Հայաստանի և հայ ժողովրդի անունից՝ բացատրելով, թե «որն է իրականում», ըստ ՌԴ-ի, հայկական շահը։
«Մենք ելնում ենք նրանից, որ ՀԱՊԿ-ում մնալը և վերադարձը լիարժեք խորհրդակցություններին, կառույցի շրջանակում քննարկումներին, համապատասխանում են, առաջին հերթին, Հայաստանի ժողովրդի և հայկական պետության շահերին։ Օբյեկտիվորեն, մեր կարծիքով, ՀԱՊԿ-ի մեխանիզմին այլընտրանք Հայաստանի անվտանգության ապահովման տեսանկյունից չի դիտարկվում»,- ասել է ռուս դիվանագետը։
Նա նշել է, թե ՀԱՊԿ անդամ երկրները միշտ բաց են եղել և մնում են Երևանին օգնություն ցուցաբերելու հարցում։
«Ժամանակին Հայաստանին առաջարկվել են և՛ ռազմատեխնիկական բնույթի մասնագիտացված կադրերի պատրաստման միջոցառումներ, և՛ ՀԱՊԿ դիտորդական առաքելության ուղարկում Հայաստանի և Ադրբեջանի սահմանային շրջաններ։ Բայց, ցավոք, այդ փուլում այդ գաղափարներն ու առաջարկները հավանության չարժանացան ու կյանքի չկոչվեցին»,- ասել է Գալուզինը։
Նա հույս է հայտնել, որ «ինչքան շուտ Երևանը հաղթահարի ՀԱՊԿ-ի հետ կապված իր կասկածները և վերադառնա կառուցողական, արդյունավետ և բովանդակալից քննարկումներին կազմակերպության օրակարգային հարցերի քաղաքական և փորձագիտական մակարդակներում, այնքան լավ»։
