07.10.2026 | 23:00
Երթևեկության կազմակերպման փոփոխություն՝ Հակոբ Պարոնյան փողոցում
ՀԱՊԿ «Անխորտակելի եղբայրություն 2024» զորավարժությունները կանցկացվեն Ղազախստանում
Քաղաքականություն
14.02.2024 | 15:23
2024 թվականին Հավաքական անվտանգության պայմանագրի կազմակերպությունը (ՀԱՊԿ) մի քանի համատեղ ուսումնական միջոցառումներ կանցկացնի Ղրղզստանում, Տաջիկստանում և Ղազախստանում, ճեպազրույցում հայտարարել է ՀԱՊԿ միացյալ շտաբի պետ, գեներալ-գնդապետ Անդրեյ Սերդյուկովը, փոխանցում է ՏԱՍՍ-ը։
«Ղազախստանի Հանրապետության տարածքում նախատեսվում է ՀԱՊԿ խաղաղապահ ուժերի հետ «Անխորտակելի եղբայրություն 2024» հրամանատարաշտաբային զորավարժության անցկացումը»,- նշել է շտաբի պետը։
Նրա խոսքով՝ կազմակերպությունը կշարունակի ներգրավել պաշտպանական գերատեսչությունների, հիմնարար կրթական, մեթոդական և հետազոտական կազմակերպությունների ներկայացուցիչներին՝ ուսումնասիրելու ՀԱՊԿ հավաքական անվտանգության համակարգի ուժերի և միջոցների զարգացման արդի խնդիրները։
«Ընթացիկ տարում, ի թիվս հիմնական համատեղ ուսումնական միջոցառումների, նախատեսվում է սեպտեմբեր-հոկտեմբեր ամիսներին Ղրղզստանի տարածքում՝ Կենտրոնական Ասիայի հավաքական անվտանգության տարածաշրջանում անցկացնել «Փոխգործակցություն 2024» հրամանատարաշտաբային զորավարժություն ՀԱՊԿ արագ արձագանքման հավաքական ուժերի հետ, «Որոնում 2024» հատուկ զորավարժություն հետախուզական ուժերի հետ, «Էշելոն 2024» հատուկ զորավարժություն ՀԱՊԿ զորքերի նյութատեխնիկական ապահովման ուժերով և միջոցներով»,- ասել է նա։
Սերդյուկովը հայտնել է նաև, որ Տաջիկստանում կանցկացվեն «Սահմանագիծ 2024» զորավարժություններ Կենտրոնական Ասիայի տարածաշրջանի արագ տեղակայման հավաքական ուժերի (CRDF CAR) ստորաբաժանումների հետ։
«Զորավարժությունների ակտիվ փուլերում նախատեսվում է, որ ՀԱՊԿ անդամ չհանդիսացող երկրների, միջազգային կազմակերպությունների և Ղազախստանի Հանրապետությունում, Ղրղզստանի Հանրապետությունում և Տաջիկստանի Հանրապետությունում հավատարմագրված ռազմադիվանագիտական կորպուսի ներկայացուցիչները կմասնակցեն որպես դիտորդ»,- հավելել է Սերդյուկովը։
