15.09.2026 | 17:17
Հանցավոր ծագում ունեցող 75 մլն դրամ է փոխանցվել պետական բյուջե
Պենտագոնի ղեկավար Լլոյդ Օսթինը կրկին հոսպիտալացվել է
Քաղաքականություն
12.02.2024 | 13:09
ԱՄՆ պաշտպանության նախարար Լլոյդ Օսթինը կրկին հոսպիտալացվել է «ախտանիշներով, որոնք համապատասխանում են միզապարկի խնդրին»։ DW-ի ռուսական ծառայության փոխանցմամբ՝ այս մասին հայտնել է Պենտագոնի խոսնակ Պատրիկ Ռայդերը։
Կեսօրին Օսթինին տեղափոխել են Ուոլթեր Ռիդի ազգային ռազմական բժշկական կենտրոն, ասել է նա։ Այս մասին հայտնել են պաշտպանության փոխնախարարին ու ԱՄՆ ԶՈւ շտաբների պետերի միացյալ կոմիտեի նախագահին, ինչպես նաև Սպիտակ տանը և Կոնգրեսին։ Պենտագոնի ղեկավարը հոսպիտալացման ընթացքում իր պարտականությունները հանձնել է իր տեղակալ Քեթլին Հիքսին։
ԱՄՆ պաշտպանության նախարարը փետրվարի 13-ին պետք է թռչեր Բրյուսել՝ անցկացնելու Ուկրաինայի պաշտպանության կոնտակտային խմբի հաջորդ համաժողովը (հայտնի է նաև որպես Ռամշտեյնի ձևաչափ): Դրանից հետո Օսթինը պետք է մասնակցեր ՆԱՏՕ-ի պաշտպանության նախարարների հանդիպմանը։ Անհասկանալի է, թե նրա հոսպիտալացումն ինչպես կազդի այս ծրագրերի վրա:
Նախորդ անգամ Պենտագոնի ղեկավարը հոսպիտալացվել էր Ամանորին՝ շագանակագեղձի քաղցկեղից հետո վարակիչ բարդությունների պատճառով։ ԱՄՆ նախագահ Ջո Բայդենն Օսթինի ախտորոշման, ինչպես նաև նրա հոսպիտալացման մասին իմացել է միայն հունվարի 9-ին, ինչը Սպիտակ տան ղեկավարի դժգոհություն էր հարուցել։ Բայդենը պահանջել է թափանցիկություն ապահովել բարձրաստիճան պետական պաշտոնյաների աշխատանքի մեջ։
