Քաղաքականություն
09.02.2024 | 19:45
ՌԴ ԱԳՆ պաշտոնական ներկայացուցիչ Մարիա Զախարովան, առաջ անցնելով Բաքվի իր գործընկերներից, քննադատել է ԵԱՀԿ դիտորդական առաքելության զեկույցը Ադրբեջանում փետրվարի 7-ին տեղի ունեցած արտահերթ նախագահական ընտրությունների վերաբերյալ։
«Ես ուղղակի ապշած և ցնցված էի ԵԱՀԿ Ժողովրդավարական հաստատությունների և մարդու իրավունքների գրասենյակի (ԺՀՄԻԳ) արձագանքից, նրանք պաշտոնական հայտարարություն են տարածել Ադրբեջանում ընտրությունների արդյունքների վերաբերյալ։ Նրանք մի կողմից ընդունում են, որ ընտրությունները կազմակերպված են արդյունավետ, մյուս կողմից ասում են, որ Ադրբեջանի նախագահական ընտրություններին մասնակցած թեկնածուները բավարար նախանձախնդրություն չեն ցուցաբերել՝ ցույց տալու, որ ունեն իրենց օրակարգը։ Այսինքն՝ դարձյալ ընտրությունները չեն, որ ձեզ դուր չեն գալիս, այլ ընտրությունների արդյունքը։ Դա է խնդիրը»,- ասել է Զախարովան։
Նա նշել է, որ ԵԱՀԿ-ն չի լսել պետության համար չափազանց կարևոր պահին հասարակության կոնսոլիդացման մասին, ինչը նշանակում է, որ նրանք պատկերացում չեն ունեցել՝ ինչպես դիտարկել ընտրությունները։
Նշենք, որ նախօրեին ԵԱՀԿ/ԺՀՄԻԳ դիտորդական առաքելության ներկայացուցիչները Բաքվում կայացած մամուլի ասուլիսում ներկայացրել էին ընտրությունների նախնական դիտարկումները։ Ըստ դիտորդների՝ արտահերթ նախագահական ընտրություններն անցել են սահմանափակ միջավայրում, և թեև ընտրությունների նախապատրաստական աշխատանքներն արդյունավետ կառավարվել են, սակայն դրանք աչքի են ընկել քաղաքական այլընտրանքների բացակայությամբ, լրջագույն ընտրախախտումներով։
«Ընտրությունների օրը դիտորդներն արձանագրել են լուրջ խախտումներ՝ հիմնականում քվեարկության գաղտնիության, բազմակի քվեարկության դեմ երաշխիքների բացակայության, քվեաթերթիկների լցոնումների և այլն։ Սա լուրջ հարցեր է առաջացրել քվեաթերթիկների հաշվարկի ամբողջականության վերաբերյալ»,- ասել էր ԵԱՀԿ ԽՎ պատվիրակության ղեկավար Դանիելա Դե Ռիդերը։
Ուշագրավ է, որ պաշտոնական Բաքուն դեռևս չի արձագանքել ԵԱՀԿ զեկույցին։
Էմմա Չոբանյան
