Ըստ բնակիչների՝ կա վարկած, որ Նոր Արեշում պայթյունը միտումնավոր է եղել

Երեկ ժամը 11։43-ին Էրեբունի վարչական շրջանի Նոր Արեշ թաղամասի 34-րդ փողոցում տեղի էր ունեցել պայթյուն, որի հետևանքով հիմնովին փլուզվել է 2 տուն, իսկ հարակից տները վնասվել են։ Պայթյունի հետևանքով կա 2 զոհ,  2 վիրավոր։ Էրեբունի բժշկական կենտրոնից հայտնեցին, որ վիրավորների վիճակը այսօր արդեն գնահատվում է միջին ծանրության, տուժածները գտնվում են բժիշկների հսկողության տակ։

Գագիկ Խուրշուդյանի նորակառույց տունը չնայած հիմնովին չի փլուզվել, սակայն լուրջ վնասներ է կրել։ Նա պատմում է․«Ես ապրում եմ արտերկրում, պատրաստվում էինք ամբողջ ընտանիքով Հայաստան տեղափոխվել։ Հիմա սպասում եմ փոխհատուցման, դրանից է կախված՝ կտեղափոխվենք, ի վերջո, թե՝ ոչ։ Ես չեմ պատրաստվում ընտանքիս բերել ճաքած պատերի մեջ ապրելու։ Ոչ կարող եմ այս ճաքերը նորոգել, ոչ էլ՝ քանդել, կրկին կառուցել, չգիտեմ հիմա՝ ինչ անել»։

ՀՀ Քննչական կոմիտեի հաղորդմամբ՝ դեռևս ստուգման ենթակա տվյալներով, պայթյունը տեղի է ունեցել Նոր Արեշ 27–րդ փողոցի 23-րդ տանը՝ գազի արտահոսքի և բնակչի կողմից կրակայրիչը վառելու հետևանքով: Որոշում է կայացվել համապատասխան ընկերությունից առգրավել նշված տան գազի սպասարկման վերաբերյալ առկա փաստաթղթերը։ Նշանակվել է պայթյունատեխնիկական, հրդեհատեխնիկական, ապրանքագիտական, շինարարարատեխնիկական, դատաբժշկական, դիակի դատաբժշկական համալիր փորձաքննություն։

Ըստ բնակիչների՝ կա վարկած, որ պայթյունի հեղինակը կարող է լինել հենց Հրանտ Սարգսյանը, որի տանն էլ եղել է ենթադրելի գազի պայթյունը։ Խոսելով Հրանտի ընտանիքի մասին՝ ասում են․

«Սովորական ընտանիք են, մենք չգիտենք ինչ հանգամանքներում է եղել պայթյունը, բոլոր ընտանիքներում էլ լինում են վեճեր, շատ բան ասել չենք կարող, թող հետաքննության արդյունքում պարզեն բոլոր մանրամասները»։

Լիլի Գևորգյան

Մարիետա Միքայելյան