«Ազգային առաջընթացը» պահանջում է Ավինյանի հրաժարականը

«Ազգային առաջընթաց» խմբակցությունը պահանջում է Երևանի քաղաքապետ Տիգրան Ավինյանի հրաժարականը: Ավագանու հինգ անդամների մանդատից զրկելու օրակարգով արտահերթ նիստին ներկայանալու են հենց այս օրակարգով:

Խմբակցությունն այս որոշումը կայացրել է Հայկ Մարությանի գլխավորած ժողովի ժամանակ: Այս մասին Factor.am-ին հայտնեց խմբակցության անդամ Գրիգոր Երիցյանը:

««Քաղաքացիական պայմանագիր» կուսակցությունը իր կցորդների հետ միասին որոշել է Երևանի ավագանուց հեռացնել ամենամեծ ընդդիմադիր խմբակցության՝ «Ազգային առաջընթաց»-ի լիդեր Հայկ Մարությանին և ավագանու ընդդիմադիր մի շարք այլ անդամների։ Իրավական և քաղաքական առումով թերի այս գործողությունը բացառապես մեկ նպատակ է հետապնդում՝ լռեցնել ընդդիմության ձայնը և զրկել նրան կոռումպացված ու ապաշնորհ քաղաքային իշխանության վնասաբեր որոշումների դեմ պայքարելու հնարավորությունից։

Քաղաքական դիրքորոշում արտահայտելու՝ ընդդիմադիրների իրավունքը ժողովրդավարության կարևորագույն սկզբունքներից է և տեղական ինքնակառավարման հիմնասյուներից։ Իշխող փոքրամասնությունն այս կամայական գործելաոճով արհամարում է մեր ուժին ձայն տված յուրաքանչյուր երևանցու քվեն։

Ժամանակն ապացուցեց, որ օրվա իշխանությունը թքած ունի իր հռչակած հեղափոխական արժեքների վրա և առաջնորդվում է բացառապես նեղ խմբակային շահերով։ Միակ հարցը, որ իմաստ ունի քննարկել այս իշխանության հետ, մեկն է՝ հեռացնել երևանցիների առողջության ու գրպանի վրա արդեն իսկ չափազանց թանկ նստած պսևդոքաղաքապետին»,- ասվում է խմբակցության հայտարարությունում:

Հիշեցնենք, որ «Քաղաքացիական պայմանագիր» և «Հանրապետություն» խմբակցությունները նախագիծ են մշակել, որով առաջարկում են մանդատից զրկել «Ազգային առաջընթաց» խմբակցության անդամ, նախկին քաղաքապետ Հայկ Մարությանին և «Մայր Հայաստան» խմբակցության անդամներ Նարինե Հայրապետյանին, Սոնա Աղեկյանին, Զարուհի Փոստանջյանին, Գևորգ Ստեփանյանին:

Նախագծերի հիմնավորման մեջ նշվում է, որ որոշման պատճառը 5-րդ գումարման առաջին նստաշրջանի ընթացքում տեղի ունեցած նիստերի քվերակությունների կեսից ավելիին չմասնակցելն է: Թե´ «Ազգային առաջընթացը», թե´ «Մայր Հայաստանը» վստահ են` սա քաղաքական որոշում է: «Ազգային առաջընթացը» ավագանիում ունի 14, իսկ «Մայր Հայաստանը»` 12 մանդատ: Միայն ՔՊ և «Հանրապետություն» խմբակցության անդամների կողմ ձայները բավարար չեն, որպեսզի մանդատից զրկեն ավագանու ընդդիմադիր անդամներին: Արտահերթ նիստը կկայանա փետրվարի 7-ին:

Արփի Հակոբյան