Հայկ Մարությանը և ավագանու այլ անդամներ կարող են զրկվել մանդատից

Երևանի ավագանին փետրվարի 5-ին արտահերթ նիստ կգումարի։ Օրակարգում ընդգրկված է 6 հարց։ Factor.am-ը քաղաքապետարանի կայքից տեղեկանում է, որ օրակարգի 6 հարցերից 5-ը վերաբերում է ավագանու մի շարք անդամների լիազորությունները վաղաժամկետ դադարեցնելուն։

Ավագանին պատրաստվում է մանդատից զրկել «Մայր Հայաստան» խմբակցության անդամներ Նարինե Հայրապետյանին, Սոնա Աղեկյանին, Զարուհի Փոստանջյանին և Գևորգ Ստեփանյանին, «Ազգային առաջընթաց» խմբակցության անդամ, նախկին քաղաքապետ Հայկ Մարությանին։

Ավագանին պատրաստվում է նշված անդամներին զրկել մանդատից 5-րդ գումարման առաջին նստաշրջանի ընթացքում տեղի ունեցած նիստերի քվերակությունների կեսից ավելիին չմասնակցելու համար։

«Բացակայությունները հարգելի համարվելու վերաբերյալ տվյալներ Երևանի քաղաքապետարան չեն ներկայացվել»,- նշված է ավագանու «ՔՊ» և «Հանրապետություն» խմբակցությունների անդամների հեղինակած նախագծում։

Երևան քաղաքում ՏԻՄ օրենքի 20-րդ հոդվածի 2-րդ կետով սահմանվում է՝ ավագանու անդամի լիազորությունները կարող են վաղաժամկետ դադարեցվել ավագանու անդամների ընդհանուր թվի ձայների մեծամասնությամբ ընդունված որոշմամբ, եթե նա մեկ հերթական նստաշրջանի ընթացքում անհարգելի պատճառով բացակայել է ավագանու նիստերի կամ քվեարկությունների ավելի քան կեսից կամ հանձնաժողովի նիստերի կեսից:

Ավագանու արտահերթ նիստի վերջին՝ 6-րդ հարցը վերաբերում է «Երևան համայնքում 2024 թվականի տեղական վճարների գծով արտոնություններ սահմանելու մասին» N 45-Ն որոշման մեջ լրացումներ անելուն։ Եթե այս որոշումն ընդունվի, ապա կիրակի օրերին կարմիր գծերում կայանելն անվճար կլինի։ Այս նախագիծն էլ հեղինակել է «Հանրային ձայն» խմբակցության անդամ Վահան Ավագյանը։

Արփի Հակոբյան