ՀՀ-ն դիմել է ՌԴ-ին Արթուր Վանեցյանի եղբորը հանձնելու միջնորդությամբ
Հասարակություն
02.02.2024 | 13:02![](https://factor.am/wp-content/uploads/2024/02/timthumb_v1_1.thumb_.jpg)
Գլխավոր դատախազությունը ՀՀ իրավասու մարմինների կողմից հետախուզվող Կարեն Վանեցյանի նկատմամբ քրեական հետապնդում իրականացնելու նպատակով, հանձնման մասին միջնորդություն է ուղարկել Ռուսաստանի Դաշնության գլխավոր դատախազություն: Այս մասին Factor․am-ին հայտնեցին Դատախազության լրատվական ծառայությունից՝ այլ մանրամասներ չհաղորդելով։ Նշենք՝ Կարեն Վանեցյանը «Պատիվ ունեմ» խմբակցության պատգամավոր, ԱԱԾ նախկին տնօրեն Արթուր Վանեցյանի եղբայրն է։
Հունվարի 29-ին ռուսական РБК լրատվամիջոցը հայտնել էր, որ Մոսկվայում ձերբակալվել է Հայաստանում հետախուզման մեջ գտնվող՝ նավթարդյունահանող ռուսական խոշորն ընկերության սեփականատեր Կարեն Վանեցյանը։
Մոսկվայում բերման են ենթարկել Արթուր Վանեցյանի եղբորը՝ գործարար Կարեն Վանեցյանին
Շատ չանցած՝ փաստաբանական խումբը հայտարարություն տարածեց, թե Կարեն Վանեցյանը գտնվում է ազատության մեջ և պնդեց, թե տարածվող լուրերը չեն համապատասխանում իրականությանը:
Հիշեցնենք՝ ըստ Գլխավոր դատախազության՝ Կարեն Վանեցյանը, հանդիսանալով Կիպրոսի Հանրապետությունում գրանցված՝ ՀՀ ոչ ռեզիդենտ կազմակերպության իրական շահառու, նշված կազմակերպության միջոցով 2018 թվականի հուլիսի 23-ին ձեռք է բերել և տնօրինել «Զանգեզուրի պղնձամոլիբդենային կոմբինատ» ՓԲ ընկերության 12.5 տոկոս բաժնետոմսերը:
Նշված՝ հանցավոր ճանապարհով ստացված 12.5 տոկոս բաժնետոմսերը փաստացի պատկանել են 2013-2018 թվականների ընթացքում Սուրբ Աթոռում ՀՀ արտակարգ և լիազոր դեսպանի պաշտոնը զբաղեցրած Միքայել Մինասյանին և գրանցված են եղել «Զանգեզուր Մայնինգ» ՍՊ ընկերության անվամբ: Դատախազը 2023 թվականի նոյեմբերի 1-ին հանրային քրեական հետապնդում է հարուցել Կարեն Վանեցյանի նկատմամբ. մեղադրանքը՝ փողերի լվացում:
Նրա նկատմամբ ընտրվել է խափանման միջոց կալանավորումը, որը, սակայն այս պահին կիրառելի չէ, քանի որ նախաքննության ընթացքում ԱԱԾ տնօրենի եղբոր գտնվելու վայրը պարզել հնարավոր չի եղել։
Ռոզա Վարդանյան