21.12.2025 | 22:02
Ֆուտզալի Հայաստանի հավաքականը հաղթեց Մոլդովային
Դավիթ Գալստյանի ընկերություններից մինչև ռուսական ու չինական ֆիրմաներ․ ովքեր են հայտնվել ՀՀ պետական գնումների «սև ցուցակում»
Քաղաքականություն
22.01.2024 | 18:17
ՀՀ ֆինանսների նախարարությունն արդեն շուրջ 10 տարի հրապարակում է պետական գնումների գործընթացին մասնակցելու իրավունք չունեցող ընկերությունների ցանկը։ 2013 թ-ից ի վեր այդ ցուցակում հայտնվել է մոտ 1400 ընկերություն։
Այս «սև ցուցակում» ընկերությունները հայտնվում են գնումների բողոքարկման խորհրդի որոշմամբ պատվիրատուի բողոքի հիման վրա։ Արգելքը սահմանվում է 6 ամսից մինչև 3 տարի ժամկետով։
Ֆինանսների նախարարությունը պարբերաբար թարմացնում է Գնումների համակարգի կայքում հրապարակված ցանկը։ Դրա ուսումնասիրությունից Factor.am-ը պարզեց, որ եթե մինչև 2018 թ-ի իշխանափոխությունը ցուցակում տեղ էր գտել մոտ 120 ընկերություն, ապա 2018-ի մայիսից հետո այս թիվն ավելի քան տասնապատկվել է՝ դառնալով մոտ 1280։ Ընդ որում՝ 2018 թ-ից հետո հաճախ նույն ընկերությունը մեկից ավելի անգամ է հայտնվել այս ցանկում։ Միայն 2023 թ-ի ընթացքում «սև ցուցակը» համալրել է մոտ 300 ընկերություն։
«Սև ցուցակում» բավականին ուշագրավ անուններ կան, որոնցից առանձնացրել ենք մի քանիսը․
«Ռոյալսիս Էնջինիրինգ» ՍՊԸ – գրանցված է Բրիտանական Վիրջինյան կղզիներում (օֆշորային գոտի), սեփականատերը «Պատրոն Դավո» մականվամբ հայտնի Դավիթ Գալստյանն է, որը ՀՀ պաշտպանության նախկին նախարար Դավիթ Տոնոյանի հետ մեղադրվում է առանձնապես խոշոր չափերի հափշտակություն կատարելու մեջ։
«Մոսսթոն Էնջինիրինգ» ՍՊԸ – գրանցված է Մարշալյան կղզիներում (օֆշորային գոտի), խորհրդի նախագահը նույն Դավիթ Գալստյանն է։
«Բիզնես Դայվերսիթի Լիմիթեդ» ՍՊԸ – գրանցված է Չինաստանում, ծառայություն է մատուցել ՀՀ պաշտպանության նախարարությանը։
«Էսարփի Շնայդեր Ընդ Փարթներ Ինժեներյոր-Քընսալթ» ՍՊԸ – գրանցված է Գերմանիայում, իրականացնում է շինարարական, տեխնիկական հսկողություն։
«Գլավդորստրոյ» ԲԸ – գրանցված է Մոսկվայում, զբաղվում է ճանապարհաշինարարությամբ։ Այս ցուցակում հայտնվել է Ծաղկաձորի ճանապարհների կառուցման հարցում թերացումների համար։
«Սև ցուցակում» են նաև Հայկական ատոմային էլեկտրակայանին ծառայություններ մատուցած ռուսական «ՌուսատոմԷքսպերտիզա» ՍՊԸ-ն, «ԲելԷներգոՄաշ» ԲԸ-ն, «Բիօտէկ» ՍՊԸ-ն, «Էլար Գոլդ» ՍՊԸ-ն, և այլն։
Գայանե Խաչատրյան
