26.06.2026 | 08:14
ԱԱ-2026. ԱՄՆ-ը պարտվեց գոլառատ խաղում, Ավստրալիան փլեյ-օֆֆում է. ՏԵՍԱՆՅՈՒԹ
Գործունեության մեջ չափավոր լինել․ մանրամասներ՝ առևանգման մասին հաղորդում տված Հայրապետյանի հետ պատահածից
Հասարակություն
22.01.2024 | 17:36
Երևանի ավագանու «Մայր Հայաստան» խմբակցության անդամ Նարինե Հայրապետյանին առևանգած տղամարդը հորդորել է ծավալած գործունեության մեջ չափավոր լինել։ Այս մասին Factor.am-ին ասաց նույն խմբակցության անդամ Սոնա Աղեկյանը։
Հիշեցնենք՝ Հայրապետյանը հաղորդում էր տվել ոստիկանություն այն մասին, որ հունվարի 15-ին՝ ժամը 09։30-ին Թոթովենցի փողոցից անհայտ անձինք իրեն ստիպողաբար նստեցրել են անհայտ մակնիշի ավտոմեքենա, կտորով փակել են աչքերը, տեղափոխել անհայտ վայր, որտեղ ինքը հանդիպել է մոտ 60-ից 65 տարեկան տղամարդու հետ, ում հետ քաղաքական գործունեության հետ պայմանավորված զրույց է ունեցել, որից հետո նույն անձանց կողմից, նույն կերպ իրեն տեղափոխել են Աբովյան փողոց, իջեցրել մեքենայից և հեռացել:
Սոնա Աղեկյանի փոխանցմամբ՝ Հայրապետյանն ասել է, որ իր հետ զրույց ունեցած տղամարդու դեմքը ծանոթ է եղել, բայց չի ճանաչել, թե ով է։ Արդյո՞ք առևանգումը կապ ունի ավագանու նոյեմբերի 21-ի նիստի ժամանակ տեղի ունեցած միջադեպի հետ․ Աղեկյանն ասաց՝ չի բացառում, բայցև չի կարող պնդել, քանի դեռ գործը բացահայտված չէ։ Ըստ նրա՝ «Մայր Հայաստան» դաշինքը պահանջում է, որ իրավապահները բացահայտեն կատարվածը։
Factor TV-ին մինչ այս պահը չի հաջողվել Նարինե Հայրապետյանի հետ կապ հաստատել․ դաշինքի առաջնորդ Անդրանիկ Թևանյանը հայտնել է, որ նա երկրում չէ։
Նշենք, որ ՔԿ-ն մի խումբ անձանց կողմից մարդուն առևանգելու հատկանիշներով քրեական վարույթ է նախաձեռնել։
Արփի Հակոբյան
