Աչքերը փակել են, տեղափոխել անհայտ վայր․ ինչ է հայտնի ավագանու անդամի առևանգումից

Երեկ հայտնի դարձավ, որ առևանգվել է Երևանի ավագանու «Մայր Հայաստան» խմբակցության անդամ Նարինե Հայրապետյանը։

Նա հաղորդում է ներկայացրել ոստիկանություն, որ հունվարի 15-ին՝ ժամը 09։30-ին Թոթովենցի փողոցից անհայտ անձինք իրեն ստիպողաբար նստեցրել են անհայտ մակնիշի ավտոմեքենա, կտորով փակել են աչքերը, տեղափոխել են անհայտ վայր, որտեղ հանդիպել է մոտ 60-ից 65 տարեկան տղամարդու հետ, ում հետ քաղաքական գործունեության հետ պայմանավորված զրույց է ունեցել, որից հետո նույն անձանց կողմից, նույն կերպով իրեն տեղափոխել են Աբովյան փողոց, իջեցրել մեքենայից և հեռացել: Այս մասին Factor.am-ին ասաց ՀՀ ոստիկանության ԶԼՄ-ների հետ կապի բաժնի պետ Զարզանդ Գաբրիելյանը:

Դեպքի առթիվ Քննչական կոմիտեում նախաձեռնվել է քրեական վարույթ` մի խումբ անձանց կողմից մարդուն առևանգելու հատկանիշներով։ Այս մասին Factor.am-ին հայտնեց ՔԿ մամուլի խոսնակ Գոռ Աբրահամյանը։

«Իրականացվում են քննչական, վարութային ակտիվ գործողություններ՝ հաղորդման մեջ նշված տեղեկությունները, քրեական վարույթի շրջանակներում, համակողմանի ստուգելու, իրականությունը պարզելու նպատակով։ Ոստիկանությանը տրվել է համապատասխան հանձնարարություն՝ քննությանը հետաքրքրող մի շարք հանգամանքներ օպերատիվ-հետախուզական միջոցառումներով պարզելու և վարույթն իրականացնող մարմնին ներկայացնելու վերաբերյալ»,- նշեց ՔԿ խոսնակը։

Ավագանու անդամ Նարինե Հայրապետյանը մեր հեռախոսազանգերին չպատասխանեց, ըստ կուսակիցների՝ նա այս պահին երկրում չէ։ Հայրապետյանը հանրության ուշադրության կենտրոնում հայտնվել էր ավագանու նոյեմբերի 21-ի նիստին, երբ տեղի ունեցած աղմկահարույց միջադեպի ժամանակ հայհոյել էր ավագանու անդամներին։

Հաջորդ օրը Factor TV-ի հարցին ի պատասխան նա ասել էր, որ սեռական բնույթի հայհոյանքը հնչեցրել է ի պատասխան, երբ իրեն են հայհոյել։ Տարածված տեսանյութերում, սակայն, չի երևում, թե ով է հայհոյում Հայրապետյանին։ Հիշեցնենք, որ Երևանի ավագանու նոյեմբերի 21-ի նիստում իրավիճակը սրվել էր «Հանրապետություն» խմբակցության ղեկավար Անի Խաչատրյանի ելույթի ժամանակ։

«Մայր Հայաստան» խմբակցությունից Սոնա Աղեկյանը ջուր էր շփել Խաչատրյանի վրա, վերջինս քաշել էր Աղեկյանի մազերից, սկսվել էր հրմշտոց, որը շարունակվել էր քաղաքապետարանի միջանցքում՝ վերածվելով ծեծկռտուքի։ Դրան ակտիվ մասնակցել էին 12 վարչական շրջանների ղեկավարները։ Դեպքի առթիվ խուլիգանության և բռնի գործողություններ կատարելու հատկանիշներով նախաձեռնվել է քրեական վարույթ։

Արփի Հակոբյան