23.11.2024 | 20:00
Չի ներկայացվել գույքի և ունեցվածքի 509 հայտարարագիր՝ 4 տարում․ ի՞նչ է սպասվում օրինախախտներին. ՔՆՆԱՐԿՈՒՄ
Վրաստանը սերտ գործընկերություն ունի Ադրբեջանի և Հայաստանի հետ. Ղարիբաշվիլին՝ Դավոսում
Քաղաքականություն
18.01.2024 | 18:16
Վրաստանը շատ սերտ հարաբերություններ և գործընկերություն ունի հարևան երկրների՝ Ադրբեջանի և Հայաստանի հետ, նրանք մեր եղբայրներ և բարեկամներն են։ Այս մասին ասել է Վրաստանի վարչապետ Իրակլի Ղարիբաշվիլին Դավոսի տնտեսական ֆորումի շրջանակում անցկացված պանելային քննարկումներից մեկի ժամանակ, փոխանցում է Գրուզիա օնլայնը։
Նրա խոսքով՝ Հայաստանի և Ադրբեջանի ղեկավարների դիրքորոշումն այն է, որ նրանք ցանկանում են հարաբերություններ ունենալ երկկողմ մակարդակով, ինչը, ըստ Ղարիբաշվիլիի, ճիշտ ճանապարհ է։
«Երկու տարի առաջ ես փորձեցի միջնորդություն և օժանդակություն ցուցաբերել: Մենք ունեցանք հաջող առաջին միջնորդությունը, երբ Ադրբեջանն ազատ արձակեց 15 կալանավորված անձի, իսկ Հայաստանը Ադրբեջանին հանձնեց ականապատ տարածքների քարտեզները։ Դա հաջող փորձ էր։ Բայց սա շատ բարդ իրավիճակ է։ Մենք հասկանում ենք, որ այս տարածաշրջանում շատ խաղացողներ կան։ Հավելեմ՝ ես գիտեմ Ադրբեջանի և Հայաստանի ղեկավարների դիրքորոշումը, որ նրանք ցանկանում են հարաբերություններ ունենալ միմյանց հետ երկկողմ մակարդակով։ Անձամբ ես կարծում եմ, որ դա ճիշտ ճանապարհ է, քանի որ այդքան միջնորդների, այդքան շահագրգիռ կողմերի առկայության դեպքում գործընթացը երբեմն դառնում է ավելի կոնֆլիկտային և հակաարդյունավետ։ Ըստ այդմ՝ հաջողություն եմ մաղթում նրանց։ Ես իսկապես հույս ունեմ, որ նրանք մոտ ապագայում լուծում կգտնեն եւ խաղաղության պայմանագիր կստորագրեն»,- ասել է Իրակլի Ղարիբաշվիլին։
