Քաղաքականություն
09.01.2024 | 20:46
Ստամբուլում տաքսու վարորդները քաղաքապետարանի տրանսպորտի համակարգման կենտրոնում (UKOME) հանդիպման ժամանակ արձագանքելով ուղեվարձը 28,09 տոկոսով թանկացնելուն՝ քարերով հարձակվել են UKOME-ի շենքի վրա, գրում է Duvar-ը։
UKOME-ում հանդիպման ժամանակ մի խումբ տաքսու վարորդներ հավաքվել են շենքի դիմաց՝ պնդելով, որ իրենք Ստամբուլում տարբեր երթուղիներով գործող միկրոավտոբուսները մեծ տարողունակ տաքսիների վերածելու որոշման զոհ են դարձել։ Նրանք նաև արձագանքել են դրույքաչափերը բարձրացնելու և դրա հետ կապված կանոնները նիստի օրակարգից հանելու որոշմանը:
Ծեծկռտուքի ժամանակ տաքսու վարորդները կոտրել են անվտանգության նկատառումներով տեղադրված երկաթե ճաղերը, ձվեր ու պլաստիկ շշեր նետել շենքի վրա։ Մասնակիցները կոտրել են նաև շենքի ապակիներն ու ճաղերը։
Շենք մտնել փորձող վարորդների դեմ պայքարին միջամտել են ոստիկանության հատուկ ուժերը։ Հարձակումից հետո բազմաթիվ տաքսու վարորդներ բերման են ենթարկվել։ Թեթև վնասվածքներ ստացած երեք հոգի տեղում բուժօգնություն է ստացել։
Էմմա Չոբանյան
