Քաղաքականություն
28.12.2023 | 14:23
2023 թվականի մարտին Սի Ցզինպինի՝ Մոսկվա կատարած այցի ժամանակ ՌԴ նախագահ Վլադիմիր Պուտինը Չինաստանի ղեկավարին հայտնել է, որ Ռուսաստանը մտադիր է Ուկրաինայում պատերազմել առնվազն հինգ տարի։ Այս մասին հայտնում է ճապոնական Nikkei-ը՝ հղում անելով սեփական աղբյուրներին, փոխանցում է Meduza-ն։
Ըստ լրատվամիջոցի՝ դա եղել է նախազգուշացում Սիին՝ չփոխելու ռուսամետ դիրքորոշումը։ Պուտինն իր հայտարարությամբ փորձել է Չինաստանին հավաստիացնել, որ երկարատև պատերազմը ձեռնտու է Ռուսաստանին, և որ Մոսկվան, ի վերջո, հաղթանակած դուրս կգա, չնայած այն հանգամանքին, որ այդ պահին իրավիճակն իր օգտին չէր։ Այդ խոսքերից ելնելով էլ՝ լրատվամիջոցը եզրակացություն է անում, որ չի կարելի անկեղծ ընդունել դիվանագիտական խողովակներով Պուտինի կողմից տրվող ազդանշանները հրադադարի հարցով բանակցությունների պատրաստկամության մասին։
Դեկտեմբերի 23-ին The New York Times-ը, հղում անելով իր աղբյուրներին, գրել էր, որ սեպտեմբերից ՌԴ նախագահը միջնորդների միջոցով Կիևին և նրա արևմտյան գործընկերներին հայտնել է, որ պատրաստ է դադարեցնել կրակը և սառեցնել ռազմական գործողությունները ներկայիս սահմաններում, այսինքն՝ Ռուսաստանին թողնել օպուկացված տարածքները։
Nikkei-ը գրում է, որ հնարավոր է՝ Պուտինը ցանկանում է ստեղծել պատրանք, որ նախագահական ընտրություններին ընդառաջ գնում է խաղաղության՝ ենթադրելով, որ նման մթնոլորտը բարենպաստ կլինի իր օգտին քվեարկության համար։
Միևնույն ժամանակ, հրապարակման հեղինակը կարծում է, որ Չինաստանի ղեկավարությունը դժվար թե վստահի Պուտինի՝ հինգ տարի պատերազմ վարելու մտադրության մասին հայտարարությանը։
Էմմա Չոբանյան
