Հայտնի է Խորեն Գրիգորյանի՝ աշխատանքից ազատման պատճառը

Երեկ հայտնել էինք, որ Երևանի քաղաքապետարանի շինբարեկարգման վարչության պետի պաշտոնակատար Խորեն Գրիգորյանն ազատվել է աշխատանքից։

Քաղաքապետարանից Factor.am-ի աղբյուրի փոխանցմամբ` պատճառը վերահսկողության խստացման խնդիրն է եղել։ Բանն այն է, որ Գրիգորյանի ղեկավարած վարչությունը դրվել է փոխքաղաքապետ Լևոն Հովհաննիսյանի կուրացիայի տակ, ինչը ենթադրել է խիստ վերահսկողություն, և վերջինս չի ցանկացել Հովհաննիսյանի ենթակայությամբ աշխատել:

Գրիգորյանն ասել է, որ ինքն այդպես չի կարող աշխատել, ուզում է Ավինյանի ուղիղ ենթակայությամբ աշխատել, բայց նրան ասել են, որ որոշումը «վերին ատյանից» է, և եթե չի կարող աշխատել Հովհաննիսյանի ենթակայությամբ, ապա պետք է թողնի պաշտոնը:

Խորեն Գրիգորյանի ղեկավարած վարչության աշխատանքում թերացումները վերջին շրջանում պարբերաբար հայտնվում էին բլոգերների և լրատվամիջոցների ուշադրության կենտրոնում։

Խորեն Գրիգորյանը Քաղաքապետարանի շինաբարեկարգման վարչության պետի պաշտոնին նշանակվել էր 2022 թվականի մայիսին։ Մինչ այդ նա զբաղեցրել էր «Ճանապարհային դեպարտամենտ» ՊՈԱԿ-ի փոխտնօրենի պաշտոնը, իսկ դրանից առաջ՝ «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի տնօրենի տեղակալի պաշտոնը։
Մասնագիտությամբ ազգագրագետ Խորեն Գրիգորյանը Պաշտպանության նախարար Սուրեն Պապիկյանի կուրսընկերն է, նրանք մտերիմներ են:

Ավելի քան մեկ ամիս առաջ լուրեր էին տարածվել, որ Խորեն Գրիգորյանը ազատվել է աշխատանքից, ֆեյսբուքյան գրառմամբ նա հերքել էր դրանք.

«Տեղեկացնում եմ, որ շարունակելու եմ պաշտոնավարել որպես Երևանի քաղաքապետարանի աշխատակազմի շինարարության և բարեկարգման վարչություն պետի ժամանակավոր պաշտոնակատար և լինելու եմ քաղաքապետ Tigran Avinyan / Տիգրան Ավինյանի կողքին այնքան, որքան դրա անհրաժեշտությունը կա: Իհարկե, կգա մի պահ, որ աշխատանքից դուրս կգամ , կամ այլ աշխատանքի կանցնեմ: Բայց այսօր այդ պահը չի։ Տեղեկացնեմ նաև, որ այսուհետ որակի տեխհսկողության պայմանագրերի կառավարումը ևս փոխանցվում է Շինարարության և բարեկարգման վարչությանը»,- գրել էր Գրիգորյանը:

Երևանի ավագանու հերթական ընտրություններում Գրիգորյանը, լինելով վարչության պետի պաշտոնակատար, ՔՊ-ի ընտրական ցուցակի վերջին՝ 181-րդ համարն էր:

Նշենք, որ նա ՔՊ կուսակցության անդամ է:

Արփի Հակոբյան