15.09.2026 | 11:24
«Դիլիջան» ազգային պարկի 1.75 հա հողատարածք վերադարձվել է պետությանը
Խորեն Գրիգորյանն ազատվել է Երևանի քաղաքապետարանի շինբարեկարգման վարչության պետի պաշտոնից
Քաղաքականություն
26.12.2023 | 15:16
Երևանի քաղաքապետարանի շինբարեկարգման վարչության պետի պաշտոնակատար Խորեն Գրիգորյանը սեփական դիմումի համաձայն ազատվել է աշխատանքից։ Այս մասին Factor.am-ի հարցին ի պատասխան ասաց Երևանի քաղաքապետի մամուլի խոսնակ Հայկ Կոստանյանը։
Թե ինչու է Գրիգորյանը ազատման դիմում գրել, հայտնի չէ, քաղաքապետի մամուլի խոսնակ Հայկ Կոստանյանն էլ ասաց՝ չգիտի՝ արդյո՞ք այլ ավելի բարձր պաշտոնի կնշանակվի Գրիգորյանը, թե ոչ։ Մասնագիտությամբ ազգագրագետ Խորեն Գրիգորյանից այս հարցերի պատասխանները ստանալ չհաջողվեց, նա չպատասխանեց Factor TV-ի հեռախոսազանգին։
Խորեն Գրիգորյանն այդ պաշտոնին նշանակվել էր 2022 թվականի մայիսին։ Գրիգորյանը մինչ այդ զբաղեցրել էր Տարածքային կառավարման և ենթակառուցվածքների նախարարության ենթակայության ներքո գործող «Ճանապարհային դեպարտամենտ» ՊՈԱԿ-ի փոխտնօրենի պաշտոնը, իսկ դրանից առաջ՝ «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի տնօրենի տեղակալի պաշտոնը։
Տիգրան Ավինյանի երդմնակալության օրը Factor TV-ն նորընծա քաղաքապետից հետաքրքրվել էր, թե ինչ կադրային փոփոխություններ է անելու և արդյո՞ք Խորեն Գրիգորյանը շարունակելու է պաշտոնավարել․ «Հենց լինելով ազգագրագետ՝ պարտադիր շարունակելու է մնալ շինբարեկարգման բաժնում»,- հարցին ի պատասխան ասել էր Ավինյանը։
Ճշտող հարցին՝ արդյո՞ք ինքը ողջունում է, որ մասնագիտությամբ ազգագրագետն աշխատում է որպես քաղաքապետարանի շինբարեկարգման վարչության պետի պաշտոնակատար, Ավինյանը պատասխանել էր․ «Ես ողջունում եմ լավ աշխատանքը, բարեխիղճ աշխատանքը և չեմ ողջունում ստերի հիման վրա մարդկանց վատաբանելը»։
Նշենք, որ Factor. am-ի տեղեկություններով Գրիգորյանն ազատվել է իր պարտականությունները պատշաճ չկատարելու համար։ Նրա ղեկավարած վարչությունը և հենց ինքը պարբերաբար հայտնվում էին լրատվամիջոցների քննադատությունների կիզակետում։
Արփի Հակոբյան
