07.10.2026 | 15:10
ՀՀ-ում հրթիռների արտադրության հարցի քննարկում Դելիի հետ՝ ըստ ԶԼՄ-ի // Երևանում փակ փողոցներ կլինեն․ ԼՈՒՐԵՐ
Քննարկվել է Հայաստանի և Հնդկաստանի մաքսային ծառայությունների համագործակցության ընդլայնմանը վերաբերող համաձայնագիրը
Քաղաքականություն
08.12.2023 | 16:40
Համաձայնագրով հիմքեր են ստեղծվում Հայաստանի եւ Հնդկաստանի մաքսային ծառայությունների միջեւ համագործակցության ընդլայնման ու ամրապնդման համար: Նախատեսվում է մաքսային գործին վերաբերող հարցերում փոխադարձ վարչական օգնության ցուցաբերման եւ այդ նպատակով տեղեկատվության փոխանակման ընթացակարգերի սահմանում: Հայաստանի մաքսային ծառայության համար համաձայնագրի կիրառումը կարեւորվում է նաեւ հետբացթողումային հսկողության շրջանակում պարբերաբար իրականացվող հարցումների համատեքստում՝ անհրաժեշտ իրավական հիմքի ապահովման առումով:
««Հայաստանի Հանրապետության կառավարության եւ Հնդկաստանի Հանրապետության կառավարության միջեւ մաքսային հարցերով համագործակցության եւ փոխադարձ օգնության մասին» համաձայնագիրը վավերացնելու մասին» օրենքի նախագիծն ԱԺ դեկտեմբերի 8-ի նիստում քննարկման է ներկայացրել ՀՀ պետական եկամուտների կոմիտեի նախագահի տեղակալ Աշոտ Մուրադյանը:
Նա նշել է, որ կհաստատվի ուղղակի կապ երկու երկրների համապատասխան ստորաբաժանումների միջեւ, ինչն էլ դրական ազդեցություն կունենա Հնդկաստանից ՀՀ ներմուծման եւ ՀՀ-ից Հնդկաստան արտահանման ժամանակ մաքսային կանոնների խախտման դեպքերի բացահայտման, առկա խնդիրների առավել արագ եւ օպերատիվ լուծման վրա:
Հարակից զեկույցում ԱԺ տնտեսական հարցերի մշտական հանձնաժողովի նախագահի տեղակալ Բաբկեն Թունյանը ներկայացրել է հանձնաժողովի դրական եզրակացությունը եւ հույս հայտնել, որ այն կնպաստի երկու երկրների միջեւ առեւտրաշրջանառության աճին եւ առավել անխոչընդոտ գործընթացների իրականացմանը:
