«Տուն եմ գնել, որ ամուսնանան, բայց ոչ մեկը տան բացմանը չի կանչել»․ Ոստիկանության նախկին պաշտոնյայի ցուցմունքը Վլադիմիր Գասպարյանի գործով

Հակակոռուպցիոն դատարանում այսօր ցուցմունք տվեց Վլադիմիր Գասպարյանի՝ ոստիկանապետ եղած տարիներին Ոստիկանության կրթահամալիրի նախկին պետ Հովհաննես Վարյանը։

Վերջինիս դատարան էր հրավիրվել Վլադիմիր Գասպարյանի, Լևոն Երանոսյանի և մյուսների գործով որպես վկա ցուցմունք տալու։ Նրա ցուցմունքն առնչվում էր Գասպարյանի մեղադրանքի այն դրվագին, համաձայն որի՝ Ոստիկանության կրթահամալրի գումարներով առանձնատուն է գնվել Գասպարյանի դստեր՝ Անգելինա Գասպարյանի պրոդյուսեր Քնարիկ Սասունյանի համար։

Վարյանի՝ կրթահամալիրի պետ եղած ժամանակահատվածում կրթահամալիրի մի քանի ծառայողի համար բնակարաններ են ձեռք բերվել։ Նրանց թվում, ըստ Վարյանի ցուցմունքի, նաև կրթահամալիրի ներկայիս պետի առաջին տեղակալ Միսակ Մարկոսյանն է եղել։ Սակայն Քնարիկ Սասունյանի համար ոչ թե բնակարան, այլ առանձնատուն է գնվել, ընդ որում՝ նա եղել է ոչ թե կրթահամալիրի, այլ Ոստիկանության մշակույթի կենտրոնի աշխատակից։ Սա այն դեպքում, երբ կրթահամալիրի այլ ծառայողներ էլ բնակարանի կարիք են ունեցել։

Նախաքննության ընթացքում տված ցուցմունքում Վարյանն ասել է, որ եթե իր որոշելով լիներ, ինքը կրթահամալիրի ծառայողներին կցանկանար բնակարանով ապահովել, բայց իրեն զանգահարել է Ոստիկանության տնտեսական վարչության պետ Ռազմիկ Խանզադյանն ու ասել, որ Վլադիմիր Գասպարյանն է հանձնարարել տունը գնել Կրթահամալիրի գումարով։
«Գնել և փոխանցել եմ ոստիկանության հաշվեկշռին, քանի որ Վլադիմիր Գասպարյանն էր հանձնարարել»,- ցուցմունքում գրել է Վարյանը։
Կրթահամալիրի նախկին պետը նաև փոքր-ինչ սրտնեղեց իր նախկին աշխատակիցներից։ Ասաց, որ եղել են երիտասարդ տղաներ, որոնցից հետաքրքրվել է՝ ինչու չեն ամուսնանում, պատճառաբանել են բնակարան չունենալով։

«Նրանց համար տուն են գնել, որ ամուսնանան, բայց ոչ մեկը տան բացմանը չի կանչել, Նոր տարիս չի շնորհավորել»,- ասաց Վարյանը։

Դատավոր Վարդգես Սարգսյանը նշեց, որ բնակարաններն աշխատակիցների համար գնվել է պետության միջոցներով և, ըստ էության, շնորհակալություն հայտնելու կարիք չի եղել։
Վարյանը նաև ասաց, որ գնումը կատարելիս տեղյակ չի եղել, թե ում համար է այն կատարվում։

Արաքս Մամուլյան