08.04.2026 | 09:30
Չեմպիոնների լիգա․ «Բավարիան» հաղթել է «Ռեալին», «Արսենալը»՝ «Սպորտինգին»․ ՏԵՍԱՆՅՈՒԹ
Գերեվարված Գագիկ Ոսկանյանին Ադրբեջանում ցմահ ազատազրկում է սպառնում
Քաղաքականություն
07.12.2023 | 15:09
Բաքվի Սաբունչիի շրջանային դատարանում այսօր ընթանում էր գերեվարված պահեստազորային Գագիկ Ոստկանյանի դեմ հարուցված շինծու գործով դատական նիստը։
Ադրբեջանական լրատվամիջոցների հաղորդմամբ՝ նիստում պետական մեղադրող Մուշֆիգ Ռահիմովն ընթերցել է մեղադրական եզրակացությունը։ Ոսկանյանին առաջադրված հոդվածներից մեկով («ահաբեկչություն») նրան սպառնում է ցմահ ազատազրկում, մյուս հոդվածներով՝ մինչև 20 տարի ժամկետով ազատազրկում։
Ռահիմովը դատարանից պահանջել է Գագիկ Ոսկանյանին դատապարտել 18 տարի ժամկետով ազատազրկման։
Բաքուն գերեվարված հայ զինծառայողի դեմ ապօրինի մեղադրանք է առաջադրել Ադրբեջանի քրեական օրենսգրքի 206.3.2 (մաքսանենգություն), 214.2.1 (ահաբեկչություն) և 318.2 (սահմանի ապօրինի հատում) հոդվածներով։ Ոսկանյանն իրեն մեղավոր չի ճանաչել։
Հիշեցնենք, որ օգոստոսի 16-ին պահեստազորում հաշվառված, ուսումնամարզական հավաքի մասնակից Գագիկ Ոսկանյանը լքել է մարտական դիրքը։ Ավելի ուշ պարզ է դարձել, որ ադրբեջանական կողմը գերեվարել է Ոսկանյանին։ Օգոստոսի 18-ին, ադրբեջանական դատարանի որոշմամբ, Ոսկանյանը կալանավորվել է՝ «Հայաստանի զինված ուժերի հետախուզադիվերսիոն խմբի կողմից Ադրբեջանի պետական սահմանը խախտելու» մեղադրանքով։
Էմմա Չոբանյան
