08.04.2026 | 09:30
Չեմպիոնների լիգա․ «Բավարիան» հաղթել է «Ռեալին», «Արսենալը»՝ «Սպորտինգին»․ ՏԵՍԱՆՅՈՒԹ
Ալիևը հայտարարել է, թե «Հայաստանը շատ բան է կորցնում՝ «Զանգեզուրի միջանցքից» հրաժարվելով»
Քաղաքականություն
06.12.2023 | 19:26
Հայաստանը շատ բան է կորցնում, այսպես կոչված, «Զանգեզուրի միջանցքից» հրաժարվելով, այդ թվում՝ Ադրբեջանի հետ հաղորդակցության բացման հնարավորությունից։ Նման հայտարարություն է արել Ադրբեջանի նախագահ Իլհամ Ալիևը Բաքվում անցկացվող համաժողովի ժամանակ:
Նա նշել է, թե ճանապարհը ոչ միայն երթուղի է, որը կկապի Ադրբեջանի հիմնական հատվածը Նախիջևանի հետ, այլև դրա երկայնքով, որպես տրանսպորտային միջանցքի մաս, բեռներ կփոխադրվեն Չինաստանից և Կենտրոնական Ասիայից։ Ալիևը հավելել է, թե հաշվի առնելով այս հարցում Երևանի բացասական դիրքորոշումը՝ Բաքուն և Թեհրանը պայմանավորվածություն են ձեռք բերել Իրանի տարածքով երթուղի անցկացնելու շուրջ։
«Հայաստանն իրեն զրկել է և՛ դրանից, և՛ Ադրբեջանի հետ բոլոր հաղորդակցությունները բացելու հնարավորությունից»,- ասել է Ալիևը։
Նա հավելել է, որ Հայաստանը տարբերակ ունի երկաթուղին անցկացնել իր տարածքով, որին Բաքուն չի հավակնում՝ համարելով այն ՀՀ-ի ինքնիշխան տարածքը։
Հիշեցնենք՝ նախկինում Ադրբեջանի նախագահը պարբերաբար սպառնում էր ուժով ստանալ այդ միջանցքը։
«Մենք կիրագործենք «Զանգեզուրի միջանցքը»՝ անկախ նրանից՝ Հայաստանը կուզի՞, թե՞ ոչ։ Եթե ուզում է, այդ հարցը հեշտ կլուծենք, եթե ոչ, մենք այն կլուծենք ուժով»,- հայտարարել էր Ալիևը։
Էմմա Չոբանյան
